日本乒乓美少女福原愛周三喺廁所門口，遭一年約20歲電車男迫婚，好彩最終力保清白，令我求大俠放下心頭大石！
日本《產經新聞》周四圖文並茂報道小愛被迫婚事件，《朝日》電視台亦講解事件。原來，福原愛周三替早稻田大學出戰學生聯賽，其間一年約20歲着白恤衫、孭背囊男子喺場邊示愛，仲趁佢去廁所攔住門口攞簽名㖭！
廁所門口接結婚申請書
福原愛好人路人皆知，不過今次就死都唔簽，原來，對方攞張結婚申請書佢簽！塊面紅卜卜嘅福原愛此刻嚇到面色慘白，只恨我求大俠人在香港，唔係實英雄救美，好彩最後女教練出馬解圍。
運動科學系2年級生嘅福原愛，最終助球隊擊敗日本體育大學。正當眾人歡天喜地之際，等足4個半鐘嘅電車男再次出動；於是19歲嘅福原愛喺教練保護下極速由後門離去，對方居爬牆追出，衝向停車場作最後一搏……
正當眼紅紅嘅福原愛叫天不應、叫地不聞之際，男教練河原智殺到，仲捉住電車男大喝：「做咩呀你！」對方口窒窒答：「我只係鍾意小愛啫！」10分鐘之後，愛心爆棚嘅小愛決定唔追究，電車男最後道歉離去。
人氣飆升屢被滋擾
福原愛3歲上電視台，11歲入國家隊，之後去中國打職業賽，呢種阿信精神贏盡國民歡心。本屆京奧擔任持旗手後人氣飆升，佢話回國後多次喺街被人借機碰撞。咁仲得了？我求大俠決定聽日去日本大使館，要求保護福原愛，大家話好唔好！