【澳門直擊】近日盛傳鄭嘉穎搭上佘詩曼飛起女友周麗淇，阿佘前緋聞男友林峯前晚即劃清界線，只稱看報道時感覺「點解會咁㗎」。周麗淇胞姐周汶錡昨在澳門出席活動時，力撐胞妹單純，又寸嘉穎和阿佘是「好朋友」不出奇，行街拍拖好正常，句句都有絃外之音。
鄭嘉穎和周麗淇的五年情被指因緋聞女王佘詩曼介入而告終，近日憑《溏心風暴之家好月圓》人氣急升的阿佘前緋聞男友林峯，前日現身旺角舉行新碟簽名會，獲逾百fans捧場，好不熱鬧。
林峯提及《溏心》時滔滔不絕，自讚劇中與鍾嘉欣的感情線好睇，但話題轉到阿佘另結新歡時竟馬上劃清界線。林峯指嘉穎和阿佘的緋聞很無聊，他說：「佢哋係好朋友，我冇八卦問，呢啲新聞睇完就算，係睇嘅時候覺得點解會咁㗎？」
阿佘：唔想畀人利用
阿佘昨日仍身在上海，她接受記者長途電話訪問時說：「我同嘉穎同埋吳卓羲都係好朋友，大家成日都有合作機會，成日都有一齊食飯，據我所知佢哋冇女朋友，暫時我都係單身，佢兩個雖然係好男仔，但我哋只係好朋友。我亦都唔會因為咁而避忌，期望再有合作機會，但我真係好唔想畀人利用做宣傳。」
至於鄭嘉穎則在電話中回應說：「一路以嚟，我都會完咗一段感情先至開始第二段，從來唔會重叠。我年紀唔細，都好想組織家庭、生小朋友，但我𠵱家仲搵緊自己嘅另一半，如果搵到嘅話大家就會知。」
汶錡：男女關係密切
昨日林峯與周麗淇胞姐周汶錡出席澳門一化妝專櫃開幕儀式，二人均被追問阿佘和嘉穎的緋聞。對於前日周麗淇戴墨鏡遮殘樣及眼腫，周汶錡聞悉後即反問：「吓！冇嘢呀？戴住眼鏡都知道眼腫？」對於周麗淇和嘉穎傳分手，周汶錡說：「我唔識點回應，花邊新聞都係重複又重複，下次話大結局都得㗎啦。」
問周汶錡會否認為胞妹思想單純？她語帶雙關說：「拍劇嘅男女關係好密切，咁先畀到觀眾真實感，可能拍完大家好friend，約出嚟食飯唔係咁大件事。」問她是否指阿佘和嘉穎？她謂：「佢哋好朋友唔出奇，唔畀人哋好朋友咩？咁講對大家好唔公平。」但她對阿佘和嘉穎是否拍拖沒有正面作答：「呢啲人哋私人嘢，每人有私人空間嘅。」
有報道指阿佘曾譏諷周麗淇蠢，不知男友花心，周汶錡被問及時即說：「唔好咁啦，只不過單純啫！」會否認為嘉穎花心？她卻說：「我點知？點解要研究呀？你話佢係我男朋友就話研究，男仔同女仔行街拍拖好正常啫。」
採訪：李珮洳（香港）、卓寶花（澳門）
攝影：陳順禎