溏心風暴之家好月圓鬥戲人辦 第十四回
在記憶中，楊天經做過多次有錢乖乖仔，今次在《溏心風暴之家好月圓》中都不例外，不過這位有錢乖乖仔很幸福，每次都跟靚女花旦做情侶，先有廖碧兒，今有陳法拉，艷福不淺。不過，由舞台劇起步的楊天經，仍未能擺脫誇張動作和字正腔圓的表達方法，給人緊張和生硬的感覺，看來他做戲仍需努力！ 撰文：楊潔雯
楊天經加入無綫後，拍過四套劇，每套都有機會夥拍靚女扮情侶，他日前接受訪問時說：「多謝晒，都係多謝公司畀機會。」今次他與近年火速上位的陳法拉拍檔，對於有網友覺得他們不合襯，楊天經說：「我覺得OK，劇入面佢（陳法拉）係冇嘢講，我好佩服佢，可以咁快pickup到，佢好叻女，用手機錄低晒所有老師教嘅手語，不時播嚟睇，雖然拍嗰時有導演叫佢做快啲，其實佢已經做得好好，畀着我就做唔到。」
獲提點感溫暖
《溏心風暴之家好月圓》受觀眾熱捧，連楊天經的媽咪陳寶珠都是劇迷，天經說：「媽咪有問我劇情，佢每日都會睇，之前第一輯《溏心風暴》佢都有睇。佢不時畀意見我，話可以做得放啲，今次佢話畀及格我。」對於媽咪、前輩和朋友的批評，天經照單全收，他說：「我知道表情上可以再自然啲，唔使咁緊，唔使好似舞台劇，係仲有少少問題，有好多位可以好啲，仲有好多進步空間。」
楊天經接受批評之餘，他更慶幸遇到一班好同事和好對手，得到他們的提點，他說：「初頭拍係有好多人話我太舞台劇，其實拍《家好月圓》之前啱啱做完舞台劇《王子復仇記》，仲要係古裝，所以初初我講對白時，係一個字一個字咁講，記得林峯都有提點我話：『之前做完古裝係咁，唔緊要，慢慢會慣。』」無論是台前演員，還是幕後工作人員，甚至燈光師都會提點他，令天經倍感溫暖。
高興有人認得
楊天經在一般觀眾心目中，跟劇中的有錢乖乖仔差不多，全因他有個知名度甚高的媽媽陳寶珠，他說：「我都慣咗，以前我會問點解？我都有努力，但𠵱家我冇理，你話係就係。」雖然如此，楊天經都需要別人支持，當他提到早前在元朗拍攝劇集《學警狙擊》時，竟然有一個菲律賓女士問他是不是《和味濃情》的「Honey」，當時他發出由衷的微笑，他真的很開心，因為有人認得他，是楊天經，不是陳寶珠個仔！
至於《家好月圓》收視好，眾演員都有意想不到的收穫，楊天經也開始感受到，他說：「我都希望出街後可以有更多人搵我做嘢，嚟緊已經有人搵我做司儀，仲有其他嘢傾緊，我最希望有人搵我登台唱歌。」
搶先爆：被捉痛腳阿圓成紅姨傀儡
《溏心風暴之家好月圓》今晚播映第31集，講述Sa姨（關菊英飾）與嘉美（徐子珊飾）母女關係變差，遂打算與男友恩賜（阮兆祥飾）返葡萄牙生活，荷媽（李司棋飾）乘勢約眾人替Sa姨餞行，其間感動嘉美，兩母女冰釋前嫌。
Jo飽（夏雨飾）和阿紅（米雪飾）在公在私的關係都變得疏離，Jo飽生怕所有餅舖被阿紅吞噬，與子女商量，阿卡（陳豪飾）要求升阿圓（黎諾懿飾）做總經理，否則所有子女加入家好月圓幫手，阿紅無奈答允，阿紅與前夫阿強（李國麟飾）相約阿圓商討對策及簽買舖合約，阿強威迫阿圓不要逆阿紅意思，又出手打阿圓，並踢爆阿圓曾在泰國食丸仔及撞死人，阿圓有痛腳在二人手上，被迫就範。
溏人心聲：最愛劇中金句--「唔使驚，荷媽喺大廳」
「『唔使驚，荷媽喺大廳』一定可以成為金句，𠵱家每隔一集，或者每集都會聽到呢句，次數仲越嚟越多，今日就荷媽喺大廳，之後又Jo飽喺大廳，可以引落好多人度，第日一定有好多人用。」
自選最愛場面--被拆散喊到無淚
「最深刻嗰場就係俾我媽咪（韓馬利飾）拆散，嗰場都做得幾慘，當時我要諗唔開心嘅嘢，又要我一個人講兩頁紙對白，又要係咁喊，最後喊到我喊唔出，冇晒眼淚，要出動眼藥水。」
表現最好演員--老戲骨收放自如
「我覺得一班前輩都做得好好，好似夏雨同司棋姐，大公仔auntie（關菊英），睇到佢哋收放自如，喊會盡情喊，鬧人會盡情鬧，所有嘢都係啱啱好。」