早排小藍咪同AVConsultant嘅影音顧問瑩瑩傾開，話𠵱家啲女仔都好鍾意玩家庭影院。噚日去油麻地MK1超級數碼廣場悅昇膽機專門店，老闆周革生都話以前玩膽機嘅，俗啲講句清一色係麻甩佬，𠵱家多咗女仔踩隻腳埋嚟聽膽機。
生哥解釋話，以前啲女孩子覺得膽機係發燒友嘅奢侈玩意，一部機講緊萬萬聲，仲要去到啲樓上專業試音室試機，啲女仔咪望而卻步囉。但近年巿面多咗本地同內地牌子嘅膽機，價錢回落咗好多，加上生產商推出一啲外形纖細、顏色討好如粉紫色嘅膽機，所以多咗女仔聽。膽機嘅音色幾啱女仔嘅口味，啲聲又柔又醇，一邊聽歌一邊睇書真係好鬼舒服。
生哥話，佢哋間舖設喺商場，啲女仔shopping經過會行埋去試聽。佢哋代理嘅內地牌子升藝MINIP1合併膽機，細細粒重7.5Kg，賣$1,230，配埋一對四吋喇叭賣$998，擺係房夠玩啦。再升級，啱啱新返一部MINIL3，做緊九折賣1,700元，可以放喺廳。歡迎啲女仔嚟試機，特別推介內地發燒低音歌手趙鵬嘅《山茶花》，經膽機播放啲聲溫柔到不得了！
咁有乜啱我哋啲AV男？生哥笑笑口講，最新引入一部入門頂級嘅MINIX8合併膽機，用俄羅斯膽，聲底較上一代機醇厚好多，聽人聲固然OK，輸出功率成50W，攞嚟爆機播交響樂都夠晒力水，做緊九折賣$4,800。
逢周五刊出