黎淑賢同老公許智政創辦嘅華洋坊中西醫美容中心，噚日喺銅鑼灣開幕，一班好朋友楊恭如、韓君婷同滕麗名等，撐場做剪綵嘉賓。
充當生招牌嘅黎淑賢話老公除咗用激光幫佢打走雀斑，之前仲幫佢打Botox瘦面，見到皮膚白滑嘅淑賢，真係唔似生咗3個小朋友嘅媽咪，黎淑賢仲話想整高個鼻，但係老公就反對，話唔想個老婆越嚟越唔似原本個樣。
啱啱喺年初先至承認同補習天王KenKan（簡俊傑）拍拖嘅楊恭如，噚日開口承認同對方拍拖半年，大家因為性格唔夾分開咗，佢宣佈回復單身，對於有報道話楊恭如嫌棄對方冇錢而提出分手，恭如笑住咁話：「八卦雜誌唔可信，完全同錢冇關，亦冇第三者，邊個提出分手都好，咁大個人會明白，我哋𠵱家仲係朋友。」
唔心急拍拖
回復單身嘅恭如話身邊好多追求者，但佢唔心急拍拖，至於多年嚟感情都未能開花結果，佢話：「每個人拍拖唔一定有結果，因為大家都有選擇。」佢又話揀男友最重要係睇性格夾唔夾，絕對唔係睇錢揀男友喎，𠵱家身邊嘅追求者都係圈外人，佢話最怕同圈內人拍拖多是非，盡可能避免喎！
