今年立法會選舉，投票率低，得45%，一百五十二萬人投票，本以為會益咗民建聯/工聯會，怎知道泛民主派幾好彩，保持番十九席直選議員席位，退出立法會嘅係李柱銘，陳方安生，鄭經翰，落選嘅有楊森，劉千石，補上新人有甘乃威，陳淑莊，黃成智，黃毓民與何秀蘭。新舊人比較之下，新議員更激進，爭取民主立場更硬，雖然選舉中，公民黨，民主黨與社民連種下怨恨種子，但在爭取雙普選方面，雙方唔會互扯後腿呀嗎？
民建聯在直選冇賺冇蝕，少了李國英，蔡素玉，多了陳克勤，李慧琼，工聯會犧牲了陳婉嫻，成全黃國健，淨賺王國興一席。王國興空降新西，立下汗馬功勞，擠走咗代表中產嘅周梁淑儀，於是新界西清一色成為工會民粹派天下，中產選民唔出來投票，他日唔好鬧點解政府一味增加派糖，唔益中產。
睇深一層，在雙普選與二十三條立法兩大議題方面，由於泛民穩握二十一至二十三票，特區政府唔可以強行通過議案，相信中聯辦與曾特首都唔認為二○○八年選舉係建制派大勝利。在經濟議題方面，民粹主義當道，最低工資與競爭法大有機會通過，自由黨冇咗兩位龍頭，田少與周梁，成為半隻跛腳鴨，商界都唔知搵乜人嚟支持。政府唔好以為過癮，新一屆立法會之中，老經驗，有偈傾嘅甚至乎係自己人嘅議員走咗，代之而興者一是少壯派，一是激進民主派，立法會議員容易走向兩極化，以後嗌口號者多，幹實事者少，特首與一眾局長會為之頭痛。
黃毓民與梁國雄以高票當選，反映出一個事實，就係好多人有怨氣，好想搵人代罵政府！罵人嘅議員，有邊個會好得過長毛與毓民吖，整個立法會之中，六十名議員嘅中文水平，應該係呢兩位最好，熟讀古書與馬克思嘅，又可能以呢兩位水平最高，以後毓民罵官，長毛做騷，新嘅立法會主席有難咯，林D9更要刨定書嚟應付毓民罵政制與對台事務㖭。