月到中秋份外圓，中秋佳節正值周日，球迷食住月餅賞住月之際，還有另一「球體」陪伴，就是戰罷世界盃外圍賽後，重開的歐洲聯賽，賞月還是賞波，悉隨尊便。牽牛
7星伴月原本在傳統月餅界屬至尊無上產品，浮誇嘅1大7細包裝，一個圓形巨盒藏着8個月餅，專為富豪、大老闆送禮而設，等閒家庭又點啃得落？
當年阿巴莫域治入主車路士，目空一切，購入的球星何止七星，聯賽冠軍隨即手到拿來，「月餅」食唔晒，就好似舒夫真高、基斯普施捨隔籬屋咁送畀其他人食，今季將胡禮菲臘斯放番畀曼城，一來一回蝕1,100萬鎊，原本就當派餅畀綜援戶咁，反正連續3屆6次對曼城都贏晒，今次讓你一個艾辛（因膝傷料要休息5至5個半月），但有射手杜奧巴復出，所以冇有怕。
車仔艾辛唞5個月
一山還有一山高，中國近年經濟發達，衍生出更豪更浮誇月餅，月餅餡唔再係蛋黃，而係鮑魚、魚翅等貴價食材，好唔好食已經冇人理會，總之就夠氣派夠豪氣。曼城新老闆阿法希姆，財產據報比阿巴多60倍，破英超轉會費加盟嘅羅賓奴，就係呢盒鮑翅7星伴月第1炮，個盒仲有幾多個餅冇人知。
雖說阿法之後幾個目標，好似C朗、韋拿都公開請曼城食檸檬，C朗話唔會因錢過檔，韋拿又唔會離開西班牙咁話。𠵱家曼城又將新目標放喺拜仁嘅德國前鋒普多斯基身上，普多斯基未必有鮑魚級數，但假假哋都係歐國盃亞軍主力，23歲仔大把世界；不過球迷反而關心，如果曼城又多一隻快馬，佢同羅賓奴、胡禮菲臘斯同祖奧鬥快，又會邊個跑贏？
總之呢場超級有錢佬對有錢佬肯定好睇，車仔老闆阿巴同領隊「大菲」史高拉利，點都希望趁曼城呢盒鮑翅7星伴月未「出爐」，有得贏就贏，如果唔係，下季作客曼城，可能對住一支世界明星隊。
迎月夜
鮑翅7星伴月vs傳統7星伴月
曼城vs車路士
開賽時間：周日0:30am
直播：now632台