中貿林出身中大，愛校情深。九月八日星期一吃午飯時，中貿林問我哋知唔知我哋教資會出咗一份報告，九月七日星期日見報，批評中大研究生，佢又話劉遵義校長唔露面，只由副校長回應記者，唔啱噃。
大家聽到一頭霧水，好幾位唔知佢講乜，星期日嘅報紙以大篇幅報導立法會選舉，邊間報紙理會呢啲新聞呀？見中貿林憤憤不平，唔知為乜，於是左丁山返到公司，搵番張隔夜報紙睇吓，見到九月七日《明報》A17版有條標題：「中大研究生沒列明語文表現」，內文有一句：「質保局委任的獨立評審小組在報告盛讚中文大學」，讚邊樣呢？《明報》冇提。至於中大不足之處及建議，《明報》詳細列表說明之。睇報導就似有彈冇讚嘞，唔怪得中貿林對中大嘅印象不佳。左丁山對教育認識多過中貿林啫，講中國國情就唔好同佢爭辯嘞。好多人睇報紙睇得片面，信晒報紙，十分危險。《明報》記者話「質保局成員包括劍橋前校長」，名字叫做SirColinLucas。左丁山立即上Google，打入SirColinLucas，有好多條目，一查之下，原來SirColin係牛津大學前校長（ViceChancellor1997-2004），生於一九四○，著名法國大革命史家，曾任芝加哥大學社會科學院院長。現任大英圖書館主席，來頭果然不小。但係《明報》講佢係劍橋大學前校長，為何如此？考起，你話信報紙啦，中貿林太過老實咯。
教資會轄下之質素保證局會逐間大學評審，第一間受評審嘅就係中文大學。質保局主席係陳南祿，其他成員有SirHowardNewby（今年九月就任利物浦大學校長），何文匯教授、何炘基教授與一位荷蘭教授教資會秘書長PaulStone，左丁山睇完報紙，索性恃熟賣熟，打個電話畀陳主席，佢仲以為左丁山在馬季開鑼前講吓馬㖭。聽到左丁山要問質保局評審中大嘅報告，佢立即收起笑聲咁話：「嗱，份報告書認為中文大學好好，但我知道報紙只係集中報導我哋啲建議，不及其餘，你不妨上網睇咗份報告先。」既然如此，睇過先至再講。