今日港人北上消費好普遍，師奶過境買餸視為等閒，但仍有唔少人因治安問題而卻步，總覺得身旁有個彪形大漢蛇頭鼠眼，盯實自己，一步一驚心；同一個世界，同一個心理，前熱刺射手列布夫，日前就警告「同胞」柏夫里約真高：「倫敦治安好差，最好日日匿喺屋企！」
「深色人種多犯罪」
烏克蘭前鋒列布夫，2000年以高價1,100萬鎊（約1.5億港元）加盟熱刺，3年多歲月（曾外借至費倫巴治）可用4字形容：一塌胡塗！今年都34歲嘅列布夫，唔知係咪見到俄羅斯嘅柏夫里約真高，威威加盟自己前球會，滿口葡萄酸味，所以就嚴正警告：「我唔會一個人喺白鹿徑（熱刺主場）附近散步咯，只要係聚集咗好多深色人種嘅地方，罪案率自然高！」此言帶有極端主義嘅種族歧視，還勸小朋友聽完就算。
蘇聯未解體前，俄羅斯同烏克蘭一家親，加上列布夫現效俄超魯賓卡山，可能真係出自真心；只係求大俠小人之心，而佢亦有提出「建設性」方案：「冇人想成為罪案嘅主角，如果冇乜緊要事，最好唔好自己行出倫敦街頭，以車代步穩陣好多！」唉，當年列布夫喺熱刺魂不守舍，究竟係咪日日提心吊膽，驚俾人老笠偷手機所致呢？
利物浦市多「爆格犯」
「柏夫」手瓜起𦟌，食嘢應該都會畀錢，更唔會怕啲街頭賊仔，惟所謂「明槍易擋暗箭難防」，佢同列布夫都未必知道，查實利物浦市先係罪犯旺區；紅軍新兵羅比堅尼就貫徹咗「球隊傳統」，成為第7個被「爆格」嘅現利記球員，相反阿仙奴、車路士同熱刺等倫敦球會就較少聽聞住所遭洗劫，咁即係邊個城市治安好啲？還待讀者自行判斷。