本地獨立唱作人林一峰和ThePancakes兩人合作搞show不是第一次，繼04年「１，２，３到你！音樂會」，今次「OneCakeOneLive」都係無乜主題，沒有背後大意義，這樣神化的忽開個音樂會，連佢哋自己都話「你當我哋儍了吧！」完全切合兩人一貫的個性，死問爛問有乜賣點一峰終於答：「我哋會大玩男女互唱，大唱對方的『首本名曲』，即是男歌女唱，女歌男唱！」
記者：蒙為亮
攝影：陳盛臣
即興起義，打情罵俏
問兩人為甚麼會再次搞埋一齊，他們就先打情罵俏一番。「無啊！我鍾意咗一峰好耐，哈哈……」Dejay搞笑道，而一峰隨即轉移視線說回音樂會，「其實今次合作係因為喺MyLittleAirport音樂會，我哋兩個做表演嘉賓時，發覺成4年無一齊show過，所以忽發奇想就萌生起再合作嘅念頭。我哋無乜原因底下搭上開show，的確有點無厘頭，不過音樂就係咁，可以即興，咁隨心先至有咁多人鍾意。」Dejay則表示，今次演唱會同4年前相比，發覺自己真係老咗好多。這個當然吧！「唔係年紀老，只是在台上演出老練咗，有信心咗，舊時上台會唱唱吓發夢，唔知自己想做啲乜，𠵱家做show掌握得比以前好。」Dejay更承諾OneCakeOneLive必會比以前更放，希望入場觀眾都同佢一樣越放越好。「我哋今次會用番自己一班好友班底，有CM和H仔同孔奕佳，我哋平時夾慣夾熟，玩起來特別得心應手。」真係咁熟咁了解對方？Dejay要用一樣東西代表一峰會係咩呢？「我認為一峰是一樽蒸餾水，因為佢有時真係好純，好小朋友咁，只要自己想做就做，就好似呢個show，一時感興，就付諸實行。」同樣的問題一峰就想了很久，最後竟然將Dejay比喻為地鼠，「佢做事唔蒲面，默默耕耘，好似地鼠!哈哈……」
出盡十八般技藝
談到個show有些甚麼特別環節，一峰坦言好多細節位都未傾實，至於嘉賓，Dejay就一如以往大賣關子話一峰就係佢最好嘅嘉賓，不過兩人都話一定會使盡渾身解數，令觀眾聽得開心，咁即係甚麼解數呢?原來係平時手執木結他的一峰會「轉行」吹長笛，「自己好鍾意長笛吹出來的音色，畀人好舒服的感覺；Dejay就會改吹口風琴，一路吹一路彈。」用盡十八般琴藝，都是為了取悅歌迷。但有趣的是，Dejay一話想吹，一峰又話自己識得吹，Dejay提議不如一齊吹，一峰又鬼馬咁話：「你吹我唔吹！」這兩個歡喜寃家更會在今次音樂會上互唱對方，例如ThePancakes版的〈TheBestIsYetToCome〉和一峰版的〈陽光〉等，二人會用歌聲回顧一下對方走過的音樂路，說着說着Dejay搞笑咁話可能會在台上來一個即興的抱頭痛哭，一峰立即和應：「都有咁嘅可能，因為自己都好鍾意喊。」大家係咪好期待這個環節呢?
因為friend所以一齊打band
訪問期間一峰同Dejay講講吓經常會扯到各自的生活中去，令小記只能旁聽，不知點插嘴。以下特別收錄幾句他們的閒聊對白，「喂！你呢條褲好靚，就係買咗兩百幾蚊嗰條？」「要趕下一個訪問啦，你仲去睇巴士模型？」他們很friend，但卻並不每件事都志趣相投，一峰話「我哋生活上一啲都唔夾，我鍾意睇戲，佢就一啲都唔鍾意，都唔知佢係咩人嚟！」Dejay立刻反駁，「我覺得坐在戲院三四個鐘太浪費時間，有時間不如做其他事。」一峰仲話要送一首歌給Dejay：「〈一人有一個夢想〉啱晒佢！佢咁鍾意發夢，首歌我重複聽咗好多次，都唔知佢唱乜，好啱Dejay。」Dejay又立刻回敬「有次一峰去外國旅行，突然間SMS我，話聽咗我首〈越過高山〉之後，立刻喊咗出嚟，不過我無覆佢，因為佢一年到晚喊幾廿次，費事理佢。」能夠當住對方面挖苦對方，可見兩人幾咁情同手足姊妹情深，這兩首歌他們都會在音樂會中互唱，特別期待〈一人有一個夢想〉，唔知會唔會好似當年黎瑞恩同佢啲姊妹咁着住條白色長裙攬埋一嚿呢？
09唱遊年VS新光做show
作為獨立唱作人，個人concert，集體bandshow，連精選碟都出過，不知仲有甚麼計劃和目標？一峰就表示世界咁大自己都未去晒，所以下一年將會是「林一峰唱遊年」，「我唔會俾自己停下來，有output，才會進步，我會嘗試將自己嘅樂曲同香港音樂帶到世界各地，講到好似好大咁，但其實我會在北美和亞洲其他地方舉行音樂會，呢個唱遊計劃，將會係我下一年嘅目標。」一峰果然是個鍾意飛來飛去無時停的「音樂旅人」。而Dejay就相反，會集中火力在香港大本營，「下年我最想喺新光做一場show，我知道嗰度好爆，成日有booking，又就快拆，所以就算係做到一場，都會好開心，因為是香港人集體回憶的一部份。仲有，我會做一隻fullbandlivealbum。」即係一take過，無得錯，否則要由頭錄過，Dejay坦言對這個未來大計，好有壓力，不過她承諾會畀心機炮製另一款味道的班戟，供大家品嚐。
義賣結他！義賣日記！
一峰同Dejay都認為做音樂賺錢以外，也應該多點做善事。所以今次開show也以「為善最樂」為宗旨，兩人將會在場內擺檔作割愛義賣，Dejay更加會將一支同自己出生入死嘅心愛結他做拍賣，「支結他底價$2,500，價高者得，呢支yamaha12線electric-acoustic結他陪我飛過好多地方，不過做善事，無得計，拍賣所得嘅我會全數捐畀香港宣明會。」而一峰就會捐出數十本「碩果僅存」的簽名版《交換日記》，「今次義賣得來嘅錢我想捐去愛護動物協會，希望小動物被遺棄嘅問題得到更多關注。」一峰更加話：「自己做音樂從來都唔係為賺大錢，夠玩夠旅行夠繼續做歌就OK！」夠，話難唔難，話易亦唔易喎一峰。
OneCakeOneLive音樂會
日期:10月9至12日
時間:8:15pm
地點:香港藝術中心壽臣劇院
票價:$299，$269
查詢：28584015