洪丕正（Ben）自從今年接任做渣打銀行行政總裁，就馬不停蹄四圍騰，銀行大小活動都見佢親自落場。噚日佢又由中環走到去油麻地一間小學，為第3年搞嘅「馬拉松101教育計劃」揭幕。Ben哥話佢細細個讀書時已經係運動健將，家陣都仲keep住打golf同網球，所以咁頻撲都應該難佢唔到。
講威水史面紅
華華聽佢講，讀書時乜運動都玩，田徑、球類瓣瓣啱，標槍、擲鐵餅、短跑、籃球都有玩，反而馬拉松就冇乜玩過。問到最耍家係乜，Ben話係田徑項目中嘅標槍，中三、中四時做埋學校代表隊──講到呢度，平時答記者問題淡定大方嘅Ben竟然怕醜臉紅，認真搞笑。
講番噚日個活動，大會向現場一班小學生一人派咗一個吹氣棒或者口哨，每當Ben同其他嘉賓上台時，台下小朋友就咇咇嘩嘩，搞到華華以為佢哋係小粉絲。