四叔李兆基因為貼錯市，所以喺記者面前話自己唔係幾開心。又係嘅，個市好景時，個個話要跟佢買股賺大錢，但家陣個市差，就有股民網友喺網上整個「四叔指數」，話每次佢出嚟講嘢個市就跌，輸打贏要，你係四叔都唔happy啦。
咁嘅時勢，散戶呢排似乎唔多想見到四叔，但四叔個靚新抱徐子淇就應該例外。自從06年嫁入李家，李太子淇除咗努力造人，同埋去吓名店shopping，仲同老爺一樣得閒做吓善事，做咗「智行基金會」嘅慈善大使，今日仲會代表智行基金會攞一筆善款。至於善長仁翁，唔係佢個股神老爺，而係一家喺美國上市叫BGCPartners嘅經紀行。
每分鐘起碼籌3.33萬銀
話說7年前嘅今日，有兩架飛機撞咗落紐約世貿中心，BGCPartners有658位員工就喺呢場大家忘記唔到嘅911事件中離開世界。為咗悼念一班同事，BGCPartners每年都會將911當日全球嘅佣金收入捐出嚟，至於今年香港嘅佣金收入，一半會捐去智行。舊年BGC喺香港就籌到12萬美金，即係大概94萬港銀。
今年BGCPartners答應將善款分一半畀智行，條件係子淇要扮broker。如果各位善長人翁，想千億新抱幫你落order，就可以喺今朝11點半至11點45分，打電話去BGC試吓，或者你會聽到佢動人嘅聲音。以舊年個數計，智行應該可以袋到約50萬銀，咁即係子淇每分鐘籌到3.33萬蚊，真係三三不盡嘞！
親身演出夠晒落力
講番個智行基金會，主要係關懷愛滋病人嘅慈善機構，由於智行嘅創辦人係子淇老公李家誠嘅老友，李太當然落力。今年6月，徐子淇為咗幫智行基金會籌款，苦練豎琴，當眾表演，認真出錢出力。
李華華
電郵：mailto:[email protected]