黎明日前宣佈於11月7至9日在StarHall舉行三場「MagicLife演唱會」，演出歌手為光良、衞蘭及黎明，之前有傳衞蘭遭雪藏，今趟她鍊低剛出碟的妹妹衞詩，拍住老闆黎明開騷，更會獨自孭飛演出一場，成功走出雪櫃。
黎明（Leon）自07年4月在紅館舉行一場演唱會後，事隔超過一年終再踏舞台，為慈善舉行演唱會。日前Leon為新加入公益金的胡文新補祝生日，同時宣佈11月7至9日於StarHall舉行三場慈善演唱會。
平價飛$380
Leon表示這次演唱會扣除必要開支會撥捐公益金，他說：「今次三場演唱會好多謝胡文新免收我哋三場場租，開支上幫我哋慳好多，但係我應承買飛嘅觀眾，製作上一定有好多嘢睇。」而門票分為680、480及380元，將於明天發售。
Leon指首場演唱會由光良演出，他與衞蘭（Janice）擔任嘉賓，他說：「第一場嘅主角係光良，我就同Janice做嘉賓，第二場主角係Janice，我就同光良做佢嘉賓，最後一場就我主唱，佢兩個做番我嘉賓。」而今次Janice擔大旗主唱其中一場，順勢打破被唱片公司雪藏的傳言，今趟三場個唱，她的妹妹衞詩沒份孭飛，衞蘭可謂威番次。
三場各具特色
Leon透露於演唱會上不會選唱大熱歌曲，反而會揀選次選歌曲，他說：「以前嘅演唱會都會唱A系列嘅歌，今次我就會揀晒自己鍾意嘅歌。至於光良嗰場我想加入舞台同drama嘅元素，因為佢啲MV都好重戲劇感，Janice嗰場就會多啲視覺上嘅效果。」
由於光良於11月在台灣小巨蛋舉行個人演唱會，他覺得一個月內舉行兩次演唱會是一個新挑戰，他說：「11月7號嘅演出會同台灣完全唔同，我唔會覺得有任何壓力，仲可以當係warmup。」
採訪、攝影：李珮洳
