九月七日選舉日，中午飲茶之前，梗係去咗投票站先。未去之前睇電視新聞，知道投票率偏低，暗呼民主派不妙，傳統智慧話畀我哋聽，民建聯/工聯會嘅鐵票好穩陣，必然大舉出動，相反民主派啲支持者比較散漫，隨時因為種種不成理由嘅理由唔去投票也，呢勻投票率低，泛民候選人叫急都叫唔切咯。
去到票站，唔夠十個人在排隊，夠靜局，諗咗一輪，與老婆一早喺屋企商量好，依計行事可也，各自投票畀不同冧巴。投完就去飲茶，碰到退休大編輯，佢細細聲講：「聽到中聯辦已放棄田氏兄弟。」中聯辦捧民建聯，工聯會，理所當然，但在九龍西撐梁美芬（田北辰老早踢爆），在新界東鼎力支持民建聯，旁及龐愛蘭，封殺田北俊，則係聞所未聞。唔通真係君子報仇，五年未晚？二○○三年反對二十三條立法一役，是日一併清算？田北俊乃自由黨龍頭，輸咗幾大件事啫。
晚上走去睇殘奧馬術賽，見到入場人數有三千八百人，算係好好聲勢，外國嘅殘奧馬術賽何來咁多觀眾呀？唔怪得一啲外國選手話十分感動。殘疾人士騎上馬背，能指揮馬匹做舞步馬術動作，已是神奇，我哋當然唔可以要求太高，以「荷蘭騎術女皇」安琪嘅水準嚟比較，四肢活動不靈甚至殘缺不全嘅騎手憑佢哋堅毅嘅意志，克服種種困難，好值得我哋尊敬。
十點幾，擒擒青趕返屋企，電視台發表港大票站調查報告，指田北俊機會不高，劉慧卿機會均等，不禁心為之危，李鵬飛以佢親身經驗評論，話港大票站調查有九成準確！次早清晨對照官方宣佈數字，港大調查果然準繩，證明市民對港大調查員冇講大話，鍾庭耀值得一讚。其他甚麼調查，根本背景不明，動態成疑，不說也罷，不過鍾庭耀曾對左丁山講過，選舉前鬧出民調風波，令佢覺得是非多，失卻學術研究意義，佢下屆未必再會嚟一次吃力不討好嘅票站調查工作。咁又係嘅，啲泛民中人，十分衝動，事前呼籲選民亂咁噏或者閉口不言，可謂敵友不分，充分表現某些人有聰明冇智慧。