【本報訊】螢幕上，「神奇小子」昨日在北京殘奧100米跑（痙攣6級）爭取香港第一金失敗後，在終點線上低頭痛哭；螢幕下，偉仔看見到場打氣的媽媽即轉哭為笑，一向樂天的他說：「其實唔係太失望，做出嘅時間係今年最好嘅，如果唔係喺終點前10米踩空步，成績會更好。」他坦言，100米跑落敗絕不會影響他今晚400米跑爭取個人第二牌，甚至是下周一（15日）衞冕200米跑的信心。 記者：徐嘉華
男子100米及200米跑傷殘世界紀錄保持者蘇樺偉，昨日在北京殘奧展開的100米跑（T36級，即痙攣6級）決賽出戰，雖然後段因離奇地「踩空步」，僅以12.38秒得銅牌，未能如願奪取香港第一金，但他賽後轉哭為笑說：「我未跑過咁靚嘅場，父母到場支持十分重要，好想喺佢哋面前做好成績……如果唔係喺終點前10米突然好似反地心吸力咁，踩空咗兩、三步，成績會更好。」
抽籤不利排第9線
蘇樺偉的教練潘健侶坦言愛徒的致命傷是缺少初賽一場：「原本我哋賽前諗，冇初賽，可以慳番唔少體力，但亦少咗一個爭取較有利跑道同窺探對手嘅機會。」由於今屆殘奧參加100米跑（T36級）的選手只得9名，所以各選手直入決賽，出賽跑道亦是抽籤而定，獲冠、亞軍的選手剛好抽在第5及第6跑道，蘇樺偉則在老遠的第9線跑道上，令後上的他看不清兩名主要對手的進度。
潘Sir續稱：「𠵱家跑第2名嘅英國跑手魯殊哥夫係我哋預料之內嘅勁敵，但冠軍嘅烏克蘭帕夫利克係意料之外，因為佢一向跑開400米，如果有初賽的話，我們會有個底。聽日（即今日）400米跑，到我們盡地一煲，因為400米唔係偉仔嘅強項，決賽嘅9名選手中，佢嘅最佳時間排尾二（58.9秒），冇壓力下希望改善起跑，亦會嘗試去衝最後200米，為下周一嘅200米跑預習一次。」雖然失金，但潘Sir卻滿意偉仔做出12.38秒的時間，亦是他個人今年最佳成績。冠軍帕夫利克及亞軍魯殊哥夫的時間分別是12.25秒及12.35秒。
至於在鳥巢為兒子打氣的蘇媽媽及蘇爸爸，賽後到鳥巢外與兒子深深擁抱，並對偉仔說：「放開懷抱，未來兩場比賽，做到好似平時訓練咁，繼續努力就可以喇。」偉仔今晚7時40分將出戰400米跑，上屆他奪亞而回。
眾廣告商依然力撐
雖然蘇樺偉出師不利，但其經理人公司ActionHouse表示，賽果無損他在廣告界的「叫座力」。去年初簽約經理人公司的偉仔，成為多個贊助商的代言人，包括京奧官方信用卡及一個護膚品牌，分別以6位數字贊助他備戰殘奧及做產品大使，另外更獲一助聽器生產商贊助每隻一萬港元的耳機，讓他比賽時可聽清楚指令及槍聲。該經理人公司發言人說：「偉仔的殘疾背景更能引起公眾共鳴，與他簽約一年多以來，出席無數學校及社會活動，他都很受歡迎。」
此外，香港殘奧馬術代表葉少康，今晨約9時11分將在沙田奧運馬術場舉行的級別二盛裝舞步賽個人自選動作項目，再次與愛駒「履冰之注」合作，望能取得突破性成績。
蘇樺偉小檔案
出生日期：06/10/81（26歲）
身高：1.76米
體重：63公斤
傷殘類別：痙攣6級
世界紀錄：100米跑（T36級）──12.15秒；200米跑（T36級）──24.75秒
榮譽：05年特區政府榮譽勳章/05年十大傑出青年
威水史：
殘疾人奧運
08北京：1銅（截至9月9日）
04雅典：1金2銀
00悉尼：3金2銅
96亞特蘭大：1金
遠南運動會（四年一度）
06吉隆坡：2金1銀
02釜山：4金1銀
98曼谷：3金
資料來源：《蘋果》資料室