最近連三嬸戚美珍都宣佈復出拍劇了，之前還有潘宗明、袁詠儀……一打開電視都見到這股中年勢力正強勢回歸。Game界一樣，剛巧世嘉80年代力作MegaDrive誕生二十周年，世嘉向代理Atgames售出版權，推出呢隻經典家用機的復刻手提版MegaDrivePortable，搶攻一眾三字頭老機迷，令一眾姨姨叔叔重拾少年潮流裝備。各位！係時候放低部NDS同PSP，再度擁抱青春啦！
記者:吳允冲
攝影:陳陶鈞
Model：Eriko@StageModels
世嘉經典大集合
古老當時興，MegaDrivePortable最大賣點就係集合咗20款世嘉最巔峯時期嘅經典遊戲，當中以橫向動作過關類為主，係咁意數已有《戰斧》、《獸王記》、《忍II》、《影武者》等，吉祥物《超音鼠》當然唔少得！對聽開軟硬、睇《家有囍事》嘅一輩，玩起上嚟特別有親切感，聽番啲坼坼哋嘅立體聲BGM，親切感即時湧晒上心頭。而最得一班女仔歡心的，居然係長青遊戲《ColumnsIII》（鑽石方塊），真係熟男中女一網打盡。
20隻經典遊戲係好玩，不過最可惜係只得單打，對當年以合作過關嘅動作Game嚟講，感覺有啲遺憾，不過點都好，二百零蚊買番呢堆懷舊正Game，點都抵玩過古董喇。
AV駁電視
雖然此機只得三粒ABC掣同一個方向鍵，功能同賣相同樣懷舊；2.4"屏幕同PSP完全無得比，玩得耐會睇得辛苦，幸好機身附設AVOut接口，嫌芒細大可駁番落電視玩，重溫以前打MegaDrive嘅感覺。
筆者同幾位同事實地試玩過，用細芒周街打係幾過癮，不過喺公司駁芒玩原來易好多，尤其射擊類嘅Game，芒細都幾難避子彈，駁番大電視即時連過兩關，起碼挫敗感無咁大喇。
皆旺專家Sam：畫面OK惜遊戲少
讚
Game跟原裝一樣，動作、流暢程度都同以前無乜分別，以咁嘅價錢算係幾吸引㗎喇。至於屏幕質素唔算差，光亮度同流暢度OK，打咗幾鋪唔覺眼花。
彈
之前都有出過類似嘅復刻紅白機，新鮮感不大。膠殼設計太粗糙，似中國老翻玩具，拎上手同㗎仔出品差好遠，㩒掣時畫面出現鬼影，抵打！而且只得第一代《MegaDrive》遊戲，無乜驚喜。
建議：如果可以網羅其他世嘉以外的Game，或者有Download新Game的功能就會襟賣啲。
PROFILE
尺寸：136×60×19mm
重量：110g
屏幕：2.4"LCD
電池：AAA×3
顏色：紅黑、白藍
查詢：CAPCOMHK（23661001）
MegaDrivePortable $249
