溏心風暴之家好月圓鬥戲人辦 第十二回
韓馬利在《溏心風暴之家好月圓》中，飾演家樂（楊天經飾）的媽媽阿娟，一個有長期病患的媽媽，為了不想兒子娶一個啞巴老婆，不惜施以強硬態度棒打鴛鴦，最後因被啞女阿慶（陳法拉飾）的真情所感動，而以手語向阿慶道歉。韓馬利回想在拍攝前只得兩日時間自學手語，惟有加緊時間苦練，幸最後都順利完成該場戲。 撰文：何慧斯
提到今次在《溏心風暴之家好月圓》中之演出，韓馬利表示雖然拍攝過程十分趕急，不過短短幾集戲已令她過足戲癮，而且聽到坊間對該劇的讚賞，更笑稱所有辛苦都值得，亦慶幸有份參與其中，她說：「其實最初我無份casting（試鏡），可能諗住幾集戲唔使專登cast一個演員，後嚟家豪哥（監製劉家豪）打畀我，話有幾集戲叫我一齊嚟玩。到我收到劇本之後，覺得呢個有長期病患嘅媽媽其實都幾慘，初初我唔想用啲咁硬嘅態度去演繹，更加唔想成日『啄』住阿慶（陳法拉飾），只係想佢體諒我嘅處境，不過導演話想喺呢段關係入面有一個大對比，所以最後都係跟番劇本去演。」
在家苦練
問到在現實生活中，如遇上如劇集般的相同情況，又會如何處理？膝下猶虛的韓馬利笑言：「換轉係我都唔知會點做，我都未做過媽咪，不過我覺得如果係錫個仔，或者第一個反應會反對，但之後諗深一層只要個仔開心，做媽媽應該體諒和支持。」
談到韓馬利用手語向阿慶道歉一幕，她不諱言為了這場戲，曾下了不少苦功，她笑說：「最初我知道有呢場戲，仲擔心趕緊其他劇而冇時間去上堂，點知最後話我得兩日時間去學，而且仲係睇住VCD自己學，搞到嗰陣開工又練、返到屋企又練，雖然之後延遲咗個拍攝時間，但係試過幾次都唔得，到埋位時，導演話畀一晚時間我去拍，咁咪仲大壓力，成班人坐喺度睇住，大家都想快快趣收工，加上感情戲好難重複又重複咁去拍，所以當時真係好緊張，好彩最後都順利拍完。」
韓馬利更笑稱起初劇集出街後擔心被觀眾鬧，結果不但得到讚賞，她的朋友也表示十分感人，不過韓馬利就自覺有點遺憾，她說：「我工作一直都好忙，忙到連自己都冇機會睇，真係有少少遺憾！」
收視攀升
此外，《溏》劇在奧運結束之後，收視繼續攀升，成為上周最高收視劇集。上周平均收視再升兩點錄得36點，約226萬人次收看，最高收視則有38點，約239萬人次收看。
搶先爆：不甘月遭戲弄卡向美提分手
《溏心風暴之家好月圓》今晚播映第29集，Jo飽（夏雨飾）再次重返家好月圓上班，阿紅（米雪飾）為免Jo飽的老員工篤背脊，竟一次過將他們調職，嫲嫲（李香琴飾）心知有人想吞噬家好月圓，揚言準備隨時開戰，聯同管家仔（林峯飾）一齊四出調查，發現阿紅與前夫阿強（李國麟）緊密來往，商討買舖事宜。
另一方面，阿月（楊怡飾）與家人關係重修舊好，嘉美（徐子珊飾）十分妒忌，繼續破壞阿月與阿卡（陳豪飾）之間的感情，阿卡交代阿月舉辦鐘錶活動，阿月開騷前接到電話有人報稱阿卡因交通意外入院，阿月放下手頭工作飛奔到醫院，最後竟是假消息，回到家後阿月還被Sa姨揶揄受騙，繼而踢爆兩母女串通使開阿月，恩賜媽媽（梁舜燕飾）將事件和盤托出，阿卡即冷靜對嘉美說：「我哋已經完咗。」
溏人心聲
最愛劇中金句--「連笑聲都無，又點會有歡樂」
「呢部劇嘅金句真係好多，我最鍾意我同荷媽（李司棋）講話唔想個仔娶一個唔識講嘢嘅女仔，仲話『點解我改個仔個名叫家樂？因為我想佢有家庭歡樂，但係連笑聲都無，又點會有歡樂。』簡簡單單幾句話，講咗做媽媽嘅心聲。」
自選最愛場面--闖荷媽屋企搵仔
「我鍾意話我去荷媽屋企搵仔，跟住又橫蠻無理拆散佢哋，後嚟荷媽鬧大家唔明白天下媽媽嘅辛苦，之後我回心轉意，仲學手語同阿慶道歉嗰場。」
表現最好演員--關菊英鬧人可愛
「呢部戲個個都做得好好，尤其係荷媽，真係少啲功力都唔得，不過我覺得Sa姨（關菊英左）都唔錯，有時鬧人嗰陣都幾可愛。」
