選舉結果令人悲喜交集，笑聲與淚水紛至，八方噚日路經中環政府總部，見到民建聯蔡素玉，佢落選議員，唔通咁快就執包袱？佢話雖然冇得重返議會，但仍係可持續發展委員會成員，噚日到政府總部見政務司司長唐英年同環境局局長邱騰華，就施政報告畀意見。
最痛心要遣散職員
蔡菜子稱，自己係區議員，第日會喺區議會推動環保，唔一定做立法會議員先做到嘢，又話本來打算去參觀波音新飛機廠，點知工人罷工不能成行，惟有轉移陣地，過兩日同一班幫手多年職員北上玩幾日，plan咗咁多節目，八方以為蔡菜子已經忘記落選之痛，重新上路，點知講到呢度，佢卻突然失控，淚如泉湧，喊到收唔到聲。
蔡菜子梨花帶雨，有人遞咗張紙巾畀佢，不過冇人識安慰佢。佢邊喊邊講：「我諗起佢哋（職員），先至會喊。」原來佢話落選後，最痛心係要遣散一班職員，但好彩譚耀宗、曾鈺成已答應接收佢哋，安排到其他議員辦事處工作，幾個職員先唔使失業，不過佢喺電氣道個議辦就唔會保留，10月中關門大吉。
職員有出路，蔡菜子仍然淚流滿面，為免哭樣出街，佢堅拒記者影相，又話其實噚日搭的士去政府總部時，喺車上已喊咗一場，因為助手同佢講，有個清潔工人得悉蔡菜子落選，擔心佢冇嘢做三餐不繼，話要籌錢幫蔡菜子度過難關，「佢以為我一落選就好唔掂，就嚟要做乞兒呀。」講到呢度，蔡菜子喊得仲犀利，淚水好似開水喉咁不停湧出，「你話感唔感動吖！」
有啲咁有情有義支持者，難怪蔡菜子成個喊包咁，如果蔡菜子繼續喊唔停，八方擔心中環水浸。蔡菜子之前兩屆選舉，排在第二位都因為男拍檔出事而苦戰，今次輸埋，真係唔好彩，不過佢叫大家唔好再鬧曾鈺成，因為排位由黨決定，「曾鈺成都唔想排第一。」咁多人戥蔡菜子唔抵，葉劉則話據佢所知，蔡菜子心情不知幾開心，「已經放開懷抱啦，好多人搵佢，佢好多嘢做。」
mailto:[email protected]