現時有好多大公司都唔准職員積累假期太多，人事部（人力資源部多出幾個字，故此用番舊名詞）每每催促員工放假，否則過年後就要沒收假期，但係營運部門要人做嘢，一於唔准放假，點算好？會計C幾經掙扎，力爭之下，先至可以講掂老闆批准放假兩個星期，但老闆警告佢：放假後要開番幾晚夜工至得。
唔理咁多咯，一於出外充電先！去邊度好呢？本想到泰國享受陽光海灘，但泰國政局混亂，君子不立危牆之下。星馬無甚足觀，沙巴舊年去過渡周末，於是諗嚟諗去，先去日本九州，跟住奧運之後去北京。到咗福岡，立即租一架車，次日跟足GPS指示，去佐賀、長崎、阿蘇火山等地遊覽，揸車十分容易。會計C話：「如果唔係自己揸車，點會上得到阿蘇火山口吖，日本人揸車好安全，我哋一啲都唔使驚。」
九州旅遊一星期之後，飛到北京，適值奧運散會，北京變得輕鬆自在，佢唔入住酒店，特登去試新，入住金寶街北京馬會會所（按：馬會全費會員可訂房），C太讚不絕口，話從未住過咁正、咁好服務嘅「酒店」。奧運期間，北京馬會會所九十間房一早爆滿，夥計做到頭昏腦花，奧運之後，會計C一家人竟然成為「貴賓級」，俾幾十人服侍，為之受寵若驚。行出馬會，走去王府井，不外乎十零分鐘，沿路見到麗晶酒店、半島酒店等等，斜對面就係香港著名食肆利苑北京店，入面人頭湧湧，會計C在門口等到位之後，連點幾味菜，包括利苑出名嘅叉燒，侍應都話：「賣晒！」會計C為之無癮。次晚唔再去咯，在會所內之「幸運閣」吃粵菜，立即叫一味叉燒。一吃之下，C太驚呼：「乜咁正，使乜去利苑呀！」會計C話北京幸運閣之粵菜好過晒香港，馬會會員（全費會員）上京不可不試。
會計C一家人對北京市面印象甚佳，唯一遺憾就係再到紫禁城內參觀文物，印象惡劣，竟然見到宮內有內地小孩隨便屙尿，家長唔理。文物擺設唔得專業，燈光黑暗之餘，亦給遊人一種邋遢嘅感覺，C太話：「去完日本，再到北京故宮，真係覺得人哋好亁淨，我地好髒亂。」會計C就講：「北京市容好先進，道路又靚，點解故宮故步自封呢，好唔明白。」