鄭秀文（Sammi）同陳奕迅、導演麥兆輝、莊文強噚日去到屯門，宣傳Sammi久休復出拍攝嘅新片《大搜查之女》。心情開朗嘅Sammi最近桃花旺盛，身邊不時有異性出現而傳緋聞，Sammi喺台上形容戲中嘅角色同自己好相似，佢話：「我喺戲裏同現實生活中都係一個中女，恨嫁之餘事業有少少成就，同現實一樣，我嘅感情都係兜兜轉轉，好多波折。」
Sammi形容今次幾經掙扎先至順利拍完呢部戲，佢話兩年幾冇拍戲，今次畀自己唔少壓力，頭兩日拍嘅時候非常唔慣，佢仲諗過放棄唔拍㖭，好彩有導演同其他演員支持同鼓勵，先至過到自己嘅心理障礙喎！
「愛我就信埋耶穌啦」
講到佢近期嘅兩個緋聞男友，Sammi都決絕話冇可能發展，佢話：「楊智深（電影《長恨歌》編劇）係姊妹，我哋只能夠做姊妹，一世都係閨中姊妹。」至於同佢傳緋聞嘅中坑教友，Sammi更加決絕：「佢大我30幾年，係我一個好尊重嘅朋友，但係大過頭，都係年紀近啲好啲，大我30幾年，嚇死我咩！」
Sammi話最近身邊冇追求者出現，佢話如果有合眼緣嘅，一定會發展，因為工作已經唔係佢嘅生活重心，婚姻同感情先至最重要，不過，Sammi講到明，男友就算唔係基督徒，都唔可以有其他宗教背景，因為唔想屋企有兩個宗教喎！Sammi話：「愛我就信埋耶穌啦！」有心嘅男士真係要有心理準備隨時跟Sammi返教會！