【溏心風暴之家好月圓 鬥戲人辦第十一回】
陳豪去年憑《溏心風暴》首封視帝，但今次他在《溏心風暴之家好月圓》中的戲份明顯較輕，不過他覺得這反而令自己更輕鬆演活劇中角色，加上眾演員各有崗位，他不想刻意搶戲來突出自己。談到有傳無綫力谷林峯成為今屆視帝，陳豪也自言欣賞他，皆因他靚仔，唱得又演得。
撰文：王崇穎
陳豪去年憑《溏心風暴》中「得得地」一角成功吸納大批fans，更榮升視帝，今年原班人馬上陣的《溏心風暴之家好月圓》，雖然有指無綫故意加重另一主角林峯的戲份，谷他成為新一屆視帝，不過陳豪表示很滿意自己的戲份，皆因同樣能發揮演技。
陳豪日前接受訪問說：「今次個角色同上次真係好唔同，上次比較呆直單純，對感情好專一，觀眾會好鍾意，加上上次算係成套劇嘅中心人物，劇中每件事都關自己事，反而今次冇咁集中喺我一個人身上，角色比較喜劇化，套劇有好多嘈交戲份，我可以做一個中和角色，令其他角色感覺上開心啲。」
輕鬆演活角色
劇中的陳豪吊兒郎當，他澄清現實中的自己絕不是這類人，他說：「其實上次同今次嘅角色，都同自己本身性格好唔同，大家有錯覺，將兩套劇去比較，其實真係好唔同，完全係兩個唔同嘅背景。今次主要係以老前輩嘅戲為主，佢哋戲味較重，反而唔會集中喺我哋後生身上，不過今次每一個角色崗位都好清晰。戲份重唔重真係唔重要，對我嚟講主要係安守本份，要我專登搶戲，我又唔想，只係想盡量發揮到角色上嘅性格畀觀眾睇。」
去年陳豪憑《溏心風暴》成為視帝，今年原班人馬再拍《家好月圓》，問他壓力大不大？他說：「今次真係冇乜壓力同顧慮，我好放鬆演呢個角色，直頭豁咗出去，雖然今次比上次戲份少，反而有好多人讚我做得好過上次，聽到自己都覺得冇白費。」
劇中陳豪飾演的甘家大少爺甘永家（阿卡），與楊怡和徐子珊發展三角戀，他說：「我同子珊係明戀，我今次第一次同佢合作，劇中佢係有機心嘅女仔，現實中我未試過俾兩個女仔爭，反而試過俾女仔拒絕。」
與林峯關係OK
雖然眾演員已非首次合作，但卻傳出陳豪跟林峯不和，陳豪說：「唔會喇，冇乜所謂，林峯好好仔，我都好欣賞佢，佢又靚仔唱歌又好，仲有好多空間可以發展，我同佢私底下都OK，所以唔會去理呢啲傳聞。」早前曾傳陳豪在結局時會死去，他直認導演和監製曾有此構思，他說：「之前係有構思過會死，好多謝佢哋手下留情，我都有問過點解唔使死，佢哋覺得大團圓結局會皆大歡喜。」
搶先爆︰阿月被嘉美陷害 慘遭荷媽掌摑
《溏心風暴之家好月圓》今晚播映第28集，講述嘉美（徐子珊飾）一心想與阿卡（陳豪飾）二人世界到夏威夷公幹，為了除去眼中釘阿月（楊怡飾），專登假裝替她拿護照，然後將阿月的護照撕掉，嘉美返家後跪地哭喊自責大頭蝦，在的士遺失阿月的護照，嘉美成功跟阿卡到夏威夷，隨即墮入愛河，Sa姨更指嘉美第一次拍拖，十分純情。
阿月在信箱收到一封來自葡萄牙的明信片，揭發嘉美育有一子，並住在葡萄牙一所孤兒院中，阿月不憤阿卡被騙，暗中搜集證據，在家人面前大踢爆，但不獲信任，更反被嘉美與Sa姨（關菊英飾）設奸計反擊，阿月一怒之下掌摑嘉美，荷媽（李司棋飾）誤以為阿月屈嘉美，反掌摑阿月以示懲罰，阿月再離家出走。
溏人心聲
最愛劇中金句--「阿婆走得快，一定有古怪」
「『阿婆走得快，一定有古怪』呢句係我喺劇中成日講㗎，阿婆向來行路都比較慢，突然間行得咁快，仲唔係有嘢？有啲事喺你身邊發生你唔會發覺，反而你身邊嘅人會去提醒你。」
自選最愛場面--扮荷媽醜到無倫
「有場戲講我哋幾兄弟姊妹為荷媽慶祝生日，我哋仲男扮女裝，女扮男裝，真係世界奇醜派對，我扮荷媽嘅樣仲真係成個杜絲先生咁。」
表現最好演員--黎耀祥熟讀劇本
「李成昌同黎耀祥兩個都做得好好，李成昌做衰人真係入型入格，佢喺戲中好突出。至於祥仔我向來都好欣賞，佢搞笑得做文戲又得，而且好少演員好似佢咁可以好熟讀劇本到唔會NG。」