鋰電池藏針孔攝錄　偷食斷正

唔通係聞西傑作？當年星爺拍《國產零零漆》，或許無諗過手機鋰電池原來可以咁玩！呢部V8可謂祖國極品中之XO，雙卡雙待雙藍芽已經過時，佢內置單卡，但秘密武器在於鋰電池可以「分拆」輪流用，入面仲有一粒米咁細嘅針孔攝錄機，如果父母驚仔女半夜三更出來偷食，不如先裝定粒「鋰電」對準雪櫃門，昅住佢哋，再蠱惑都無所遁形啦！

記者：陳國輝
攝影：林栢鈞
Model：GiGi@puremodels

遙距百米聲畫全收

嫌主鏡頭得130萬像素太奀？梗係啦！玩得V8，根本唔志在解像度有幾勁，因為此機賣點係一個可遙控嘅針孔攝錄機。該迷你鏡頭隱藏喺鋰電池中間，好難發現，而電池側邊仲有開關掣，當你啓動佢然後再拉起機背天線之後，就可以正式拍片喇！佢雖然係國產機，但像素亦達到CIF（352×288Pixels）質素，如果插張大GB數T-Flash卡，幾乎可24小時不停錄影；另外仲有招殺着，跟機附送一條TV-Out輸出線，嫌2.8吋芒睇得太辛苦，不如駁住大電視慢慢欣賞仲正。

■走廊長度接近100米，到盡頭仲收得清楚。

當然，大家最想知接收清唔清？範圍幾遠？筆者就喺蘋果大樓一樓走廊（約100米）測試過，一條直路行到盡頭依然清晰，但轉彎有牆壁阻隔，畫面訊號便即時中斷。順帶一提，盡量將攝錄機平放枱面，當拎喺手邊行邊拍，畫面會出現嚴重搖晃，情況類似《80小時死亡直播》咁，睇到嘔！

■搵唔搵到個鏡頭？其實就係箭嘴位置。

雙鋰電池輪流玩

講解完可能仲有個疑問：「鋰電池點可能同部手機分開使用㗎？」V8就係咁騎呢，雖然可同時放入兩粒鋰電池，但其實佢只需要其中一粒電已足夠運作，再簡單啲講，錄影嗰陣用一粒電就夠喇！咁樣仲有個好處，當你唔玩遙控攝錄機嗰陣，可將佢放回機身，為手機提供電源，直至唔夠電時，亦可利用特製充電器幫佢哋充電，跟機總共有3粒鋰電（包括攝錄機），足夠輪流使用。