衞冕的南華昨日在大球場舉行的甲組聯賽揭幕戰，只能憑廸天奴的入球，以1:1迫和宿敵公民。適逢南華今季成立100周年，羅傑承對出師不利感不滿，更形容球隊只得4成水準。南華和波，球員獎金無着落之餘，前、中、後，甚至守門員，全部成了批評對象。
今季大事擴軍，總班費高達1,500萬港元的南華，聯賽開鑼戰的演出與身價不成正比。面對班費不足南華四分之一的公民（約350萬），這支上季聯賽及聯賽盃雙料冠軍，全無優勢可言，更不幸的是，今季高調由傑志加盟的陳肇麒，上半場因一次控球甩腳，成了南華失第一球的罪人。
靠廸天奴迫和公民1:1
32分鐘，徐德帥接應隊友偷去陳肇麒腳下球作出之長傳，右路壓過文彼得後成功底線傳中，公民新中鋒辛祖先開紀錄。半場落後的南華，換邊後再有史高斯受傷，只好換入廸天奴加強攻力。這位上季甲組神射手不負厚望，於72分鐘接應同是後備上陣的麥士維橫傳，頭槌建功為南華扳平1:1。
南華足主羅傑承賽後面露不悅，他說：「今場打得好差，反而對手踢得幾好。這樣的表現，與季前熱身賽一樣，缺點沒有改善。」根據南華新的獎金制度，除了贏波外，其餘賽果均沒有獎金。羅傑承說：「當然無獎金啦！你睇！郭建邦、樊偉軍、陳肇麒、史高斯及李志豪全部都踢得唔好，文彼得又慌失失，蒙廸路根本不適合踢翼鋒，中場可能較佳。」就在此時，身旁的太太梁芷珊插嘴說：「仲有守門員（張健忠）都唔得。」
陳肇麒：越想贏就越亂
陳肇麒賽後承認自己演出欠佳，這位南華7號球衣新主人說：「個心越想贏波，就越踢越亂，球隊未能好好組織攻勢。自己踢法與史高斯相似，下半場廸天奴後備落場，效果較佳。」
公民教練佐真奴因度假關係沒有出席這場揭幕戰，主席貝鈞奇澄清這位巴西教練仍屬球隊一分子。他說：「球隊踢出穩守突擊戰術，加上新外援辛祖、馬龍表現不俗，第一仗當然收貨。」本報訊
《花絮》
開鑼日送鐘大吉利是
足總同贊助商噚日為新球季造勢，除向入場球迷派發甲組特刊外，仲有特別禮物，就係個鐘（圖）；話晒開鑼，竟然送鐘畀球迷，認真大吉利是，所以負責派發嘅足總職員猛同球迷講：「呢個係計時器嚟㗎。」
捐血宣傳片口碑唔錯
南華與紅十字會合作攝製嘅「捐血行動、全城最紅」宣傳片，噚日喺大球場正式啓播。這輯製作費達7位數字、籌備大半年嘅宣傳片效果如何？單看網上討論區的口碑就知唔錯啦，球迷好快喺公仔箱睇到㗎喇。
南華新海報月中面世
南華噚日喺大球場精品店向入場球迷派發海報同賣波衫，睇真啲張海報原來係上季攞冠軍紀念版海報；問南華公關大員會唔會有新海報，佢話贊助商adidas已經幫佢哋隊波影咗，最快月中先可面世。
細佬天水圍撐場兼吼路
大佬打波，細佬又點可以唔撐場。噚日南華鬥公民場波，新軍天水圍飛馬球員（圖）老遠到大球場捧大佬場之餘，最重要當然係吼路，畢竟飛馬被視為可以爭奪5強，了解吓衞冕嘅南華有幾多斤両之餘，都要留意吓公民踢成點。
