田少屋企多靚車，投票日出動名車拉票自然冇難度。
田少噚日嚴選三部靚車組成車隊拉票壯吓聲勢，佢親自坐一架橙色Mini開篷車，另有一部寶馬X5四驅車隨行，架寶馬仲有個自訂車牌「P0WERFUL」，車如其牌，好勁。
不過幾勁都好，都要守交通規例，就算係少爺都冇情講。田少車隊去到沙田第一城拉票，幾部靚車泊係街邊，第一城管理公司出名嚴捉違例泊車，唔夠15分鐘，就有保安出嚟趕車，富貴黨都冇面畀。
田少自知𤓓咗，唔敢爭拗，即時指揮司機將幾部車駛走，自己繼續企喺街頭同街坊握手。八方聽聞自由黨喺第一城勁失票，田少噚日話要力保呢個票倉。