選舉係燒銀紙嘅遊戲，投票日燒錢更多，噚日最豪嘅助選活動，應該係陳太空降新界東為湯家驊拉票。陳太真係空降，因為湯大狀出動直升機，將陳太由九龍送到將軍澳，短短7分鐘航程，盛惠10,000大元。
尖沙嘴直飛將軍澳
陳太係泛民「吸票機」，噚日幾乎走勻全港九催票，由於時間緊逼，所以要租直升機，由尖沙嘴接走陳太，直飛將軍澳為公民黨造勢。湯大狀帶咗30人喺停機坪迎接陳太，陳太降落後即刻飛車到將軍澳，坐開篷跑車巡迴將軍澳一周。
時間話咁快就過，八方計過，陳太只喺將軍澳逗留大約45分鐘，之後就坐車去其他區助選，即係話平均每分鐘花200幾蚊，呢45分鐘拉到幾多票好難估計，湯大狀話如果可以令民主派保住21席，呢筆錢真係物有所值。
泛民集體告急，可能搞到陳太心都亂晒，噚日朝出發助選前，同埋余若薇去教堂望彌撒，祈求天主保佑泛民所有候選人都當選。