今日係立法會選舉日，左丁山早上起身第一件事。就會去投票站投咗票先，晚上會去睇殘奧馬術賽，各位入場觀眾，請你哋投咗票先至出發去沙田，投票係選民之頭等大事，唔可以搵藉口話自己唔得閒，冇時間嘅，今日有好多人行街睇戲打牌打波，但全部活動都可以排在投票之後㗎。
投票投畀邊個？左丁山首選係支持民主，支持盡快雙普選，奉行自由市場，反對政府干預之候選人。偏偏眾多民主派之中，全部都係經濟干預派，社會主義派；反對民主嘅政黨候選人之中，亦全部係干預派，社會主義派。立法會就係畀一班民主左派，反民主左派所把持，冇符。再三考慮之下，唯有投票畀一啲真係勤力為立法會做事（唔係做騷）之民主左佬中之實幹派。邊一啲係實幹派呢？以前聽局長講過：「某某某議員係好倀雞，發言冇面畀，公開會議碰到佢，好惡頂。但開一啲不受議員歡迎嘅法例修訂會議時，呢位某某某議員好勤力，做足功課，不時有建設性建議，對我有益，如果冇咗佢，我都唔知點辦。」左丁山笑佢：「咁多保皇議員，舉手支持就得啦！」局長話：「唉，唔少保皇議員唔多識英文，平時又唔做功課，開會不發言，淨係識舉手支持我，唔掂嘅啫，立法會有好多事做㗎！」
聽落都幾好笑，選民唯有小心啲揀。分析師Ｗ在香港居住，老早決定投票畀邊一位。佢媽媽家居九龍西，係退休老工人，分析師Ｗ叫阿媽投票畀某某（與佢嘅心中對象，港島候選人同黨），點知阿媽話：「唔得，我一早收到工會通知，要選某女士，我驚唔記得佢嘅號碼，將工會通知貼在大門，每日望一次，記住係第幾號！」退休工人真係忠心，視工會「通知」為聖旨，分析師Ｗ想勸阿媽轉軚，阿媽一於唔聽，唔怪得工會嘅鐵票確實穩如泰山，打風打唔甩。大記者一家有十幾票，三代人有唔同選擇，大記者想話叫各人研究如何配票畀泛民，點知一講，全家就嘈到飛起，人人有自己嘅自由選擇，不能達成共識。大記者嘅弟弟話：「聽你話搞配票？點算民主呀？我哋支持民主就係堅決維護自己嘅選擇自由！」民主派生性如此，配乜票吖，於是大記者驚民主派今日會大敗喎！