全城告急，連風水師都告急，八方近日不斷俾人追問，究竟邊個先係真告急？唔止一般選民，連政圈中人都話睇唔通，事關人人都話勢危，信得邊個！
喺一片告急聲浪之中，八方憑多年經驗分析，覺得今次選舉，最急嘅唔係候選人，而係選舉管理委員會主席彭鍵基法官。彭官懶理有人可能利用票站調查茅招配票，令好多人不滿，各黨派預計票站調查係今次選舉投訴焦點，萬一有選民同調查員口角，干擾到票站運作，後果可大可小，如果彭官不能及時平息風波，整個選舉都可能受影響。
政府高層唔放心
另一個危機，係助選團隨時爆發衝突，去年兩次選舉都有零星肢體衝突，今次選舉戰情更激烈，最後一席之爭可能只係相差一千數百票，助選團都好肉緊，一時控制唔到搞出事都唔係冇可能，去年區選黃大仙就發生公民黨被圍事件，事後選管會「賴」工作人員訓練不足，所以未能及時處理，會加強培訓云云。
八方希望彭官真係有着緊票站工作人員培訓工作，票站工作人員主要係公務員，每次選舉臨時拉伕做兼職，有位人員透露，佢哋接受訓練時間有限，選管會叫佢哋熟讀大叠指引就算，真正紙上談兵，萬一今日發生突發事件，唔急call選舉事務處實唔掂。
點票工作都係高危環節，據講選管會有信心周一凌晨可公佈結果，不過冇人當佢講真，因為香港選舉出名點票慢，幾個鐘頭有結果只係一廂情願，最弊係提高市民期望，如果不能達標，彭官唔做箭豬就奇。據小道消息，港府高層對彭官都不太放心，因此相關部門會全力支援今日選舉。
有官員笑稱可能前任選管會主席胡官實在太老練，又夠台型壓得住各黨派，基本上唔使政府操心，彭官卻連民調專家鍾庭耀都鎮唔住，何況一班老奸巨猾政客呢！邊個告急都好，選民卻唔使急，最緊要快，快啲去投票。
mailto:[email protected]