唔知同性別有冇關係，但敏妮公司有好多女仔都好怕計數，一見到大堆數字就頭痕。敏妮計數唔算叻，但讀書時最鍾意就係數學科，所以自小已經養成唔怕計數，而且仲對數字好有「好感」，每次聽股壇前輩講啲上市公司，點樣將財務報表上面嘅數字搬嚟搬去，敏妮就好似睇金庸小說一樣着晒迷。
最近敏妮發現公司原來有一位女同事，都鍾意研究上市公司嘅財務報表，佢見敏妮係「同道中人」所以畀咗條link敏妮，叫敏妮上去某個會計師朋友嘅blog睇吓，佢用好多香港上市公司嘅刁鑽財技為例，用佢哋嘅年報解釋當中精髓。
公司要分析現金流
敏妮當然睇得津津有味，但睇吓睇吓，突然間諗起一樣嘢。之前聽股壇前輩講，金融世界雖然殘酷，但投資者用真金白銀參與，家家上市公司都要按例披露公司情況，投資者有數字可作分析依據。不過，當睇到上市公司可以透過會計方法，適當時間先至披露對公司有利嘅資訊，敏妮忍唔住問股壇前輩，「你又話數字可信，但只要運用會計手法，數字就可以唔反映出實際情況，咁投資者仲可以用乜嘢嚟做依據？」股壇前輩笑咗笑就話：「我冇話所有數字都可信，睇一家公司得唔得，最緊要係睇佢嘅現金流。」
正如一個人，一身名牌，出入揸靚車，但係所有消費靠碌卡，孭落嘅卡數還極都還唔清，每個月份糧還完卡數啲利息都已經所餘無幾。
勿被光鮮外表蒙騙
相反，另一位仁兄，出入唔係逼地鐵就係等巴士，着嘅係連鎖服裝店出品，但住緊層樓供滿，卡數月月清，份糧仲可以留起大半用嚟投資，你話邊個富貴啲？
http://wanmanli.com/blogs/