「一周兩件」開欄以嚟，10蚊樓上嘅股份推介過一次咁大把，就係新地（016）。呢次第二次，主角係招商局中國基金（133），要睇位長揸。
招商局基金最新NAV31.15元，現價（18.5元）折讓講緊40%。市場裏邊，可供選擇嘅中國基金，得A50（2823），講緊係冇折讓，P/B1倍過外，另一隻翔龍基金（820），都有輕微折讓，但講緊都係得14%。齋秤折讓，招商局基金最抵買。再講，睇祖國長線好，又唔知買邊個sector，買基金就方便。
又參考埋圖表，招商局基金由4月到家陣，整咗組下降通道，通道底啱啱好又係250周線，即係13.4元呢個水位。以呢個股價水位計計，到時，隻基金NAV折讓，係講緊57%，值博率仲高。以建議撈底價，博招商局基金追番到A50嘅1倍P/B水位，價見31蚊，潛在回報率，係講緊1.3倍。
冷吼至祥博翻一番
至祥（112）最新NAV2.7元，現價（1.20元）折讓56%，今年6月底，集團每股淨現金講緊0.98元，幾乎貼近現價，既係現金牛，又有唔錯嘅折讓墊底。又至祥5月通過咗出售物業及古董畀阿媽華置（127），最遲應該呢個月尾之前搞掂。計計數，交易可以為至祥帶嚟每股淨現金值1.58元，又係高過至祥現價。繼續冷吼至祥，博上番連交易後嘅淨現金值2.56元，至祥係講緊要翻一番。