歷年選舉，鄉村地區晒馬事件時有所聞，有老友向八方報料，今年呢種情況可能冇咁猖狂，唔係大家守規矩咗，而係候選人手緊咗。據講近日新界西部份鄉村流傳，如果今日現身幫某候選人晒馬助選，「車馬費」有300蚊。
知情人士透露，呢個銀碼係近年新低，點解出手咁低，有兩個可能性，一係候選人孤寒，另一可能性係中間人食水深，呢位人士話好多兄弟聽到得300蚊，即時話唔得閒，今日幫唔到手。「300蚊搭的士都唔夠啦，當我哋係攞綜援啲阿公阿婆呀！」一位自稱拒絕晒馬鄉民咁講，佢話自己唔係選民，「返上去揼骨好過。」晒馬不成，對靠鄉村票食糊嘅候選人影響最大。