星期日，馬主N搵埋左丁山入馬房，參加拜神切燒豬儀式，馬季在九月十五日開鑼，開季前好多馬房都有一個拜神（關公）上香儀式，祈求來季順風順水，馬運亨通。馬主N上季參加拜神，佢嘅馬贏咗三場頭馬，佢啲老友更輪流拉頭馬，順利到不得了。練馬師T又係神奇，由一個中小馬房突然一季內膨脹到成為爆倉馬房，成績驚人。今季拜神完畢，問練馬師T：「今季會唔會攞練馬師冠軍呀？」練馬師T話：「講吓笑就得，想都唔敢想，頭馬有中國金牌咁多，就會非常非常開心㗎嘞！」咦，中國攞咗五十一面奧運金牌噃，練馬師T都幾知足！不過香港賽馬好睇評分，上季贏馬太多，等於馬匹評分飽和，來季就未必可以保持到贏馬紀錄，強如告東尼都要一季好好，一季稍遜，練馬師T今季要面臨好大挑戰。
馬主N拜完神，帶住左丁山周圍行去睇佢啲團體馬，去完練馬師L馬房，就去練馬師S度，行到左丁山腳軟。佢一路行，一路打電話，聽電話，問佢做乜鬼星期天都咁忙，馬主N話：「唔係忙呀，而係老婆人在布吉島，星期六下午上唔到飛機，當時唔知機場幾時可以回復正常，而且即使恢復正常，啲滯留乘客太多，機場一定大亂，上唔上到港龍客機係一個問題，所以我昨日叫老婆飛車去曼谷機場，我一路同佢用電話聯絡！」
由布吉坐車去曼谷登機，係一個辦法，但車程甚長，幾難頂，好彩馬主N太太去布吉五星酒店開會，公司支付汽車連司機嘅費用，開車十一小時趕去曼谷，卒之星期日下午四時在曼谷登機回港，亦云辛苦矣。左丁山學生時代，曾孭背囊在曼谷坐上長途巴士去布吉，記得晚上要寄宿一間簡陋「酒店」，房間內有曱甴，浴廁內有蚊，白床單已變成黑灰色，冷氣機壞咗，於是滴白花油落手、腿、足、面，倒頭便睡，竟然成晚冇蚊蟲咬，算係避過一劫。次早再上巴士，幾個鐘頭後到達布吉，入住一間沙灘平價酒店，只見窗明几淨，成身舒服晒，立即與同學撲出沙灘，跳落水，一位同學驚呼，「唉吔，我哋將啲海水整污糟咗！」當年布吉簡直係人間天堂，今天只係一般度假勝地而已。