月餅廣告鋪天蓋地，睇到令人流晒口水。九龍東白鴿黨候選人肥仔明唔使咁認真告急，有閒情打溫情牌，噚日專登叫埋兩位阿哥兼一位專程喺美國返港為佢打氣嘅細佬，四兄弟一齊喺秀茂坪邨整月餅，佢笑言係名副其實嘅「茂李」整餅。
除咗蛋黃同蓮蓉，「茂李」月餅用料最特別之處，係一定要落「橄欖油」，話要將「橄欖」掐到盡，搾亁揸盡先得。同區有個花名「橄欖」嘅民記對手陳鑑林，唔知feel唔feel到佢哋嘅力度呢？
「茂李」四兄弟整餅雖然雞手鴨腳，不過味道都唔錯。選舉規例禁止用食物款待選民，所以月餅只供助選團及義工享用，一般市民有得睇冇得食。