考牌幾耐？「四年。」揸乜車？「Crossroad。」第一架買乜車？「Crossroad。」買咗幾耐？「兩個月。」得，即係個牌雪咗三年零十個月。想試乜車？「大大架Jeep。」好，大家膽粗粗，巨無霸X54.8i決戰飛鵝山之巔。臨上車，「嘩！咁大架車我驚舞唔掂，我都係唔……」行啦，一定易過撞牆爆珠呀，嘩嘩嘩！
文：嘴嚼爺
攝：伍慶泉
讚到上山頂
羅仲謙喺《尖子攻略》扮演進攻中場玩爆珠（三角短傳）嘅阿冬，一見BMWX54.8i，即時嘩嘩聲，「嘩！個車頭犀牛咁款。」「嘩！淨係聽把聲都勁啦。」「嘩！司機位好似架戰機咁。」我都嘩，使唔使呀？好似小朋友去玩具反斗城咁興奮？上到山頂，落車，當我一步一驚心，避開草地嘅野戰痕迹──屍橫遍野嘅DomDom之時，耳邊又傳嚟嘩一聲，「嘩！估唔到咁易揸，咁大架車行山路真係好定，上斜又夠力，我唔敢踩油咋……」年輕新手初接觸4,800ccV8引擎，兼玩埋6前速Steptronic加減波，有讚無彈，不過謙仔好似好驚我哋陪佢碌落山，所以無話揸得快，試唔到0-100km/h只需6.5秒嘅加速力，「係，等我揸多幾年車先會再試，到時一定試得更盡。」
未泊過S位
劇中扮演17歲學生哥，羅仲謙其實23歲，所以已經有四年牌。「啱啱買車兩個月，Crossroad四四方方扮Hummer嘛，我成日幻想自己着住背心揸架H1，放隻手臂喺車門聽住Hip-Hop，成個黑人咁嘛，哈哈！」原來，時下年輕人嘅喜好係咁。「我都好鍾意X5，不過貴吖。」
三年一代溝，我同羅仲謙起碼有三個Gap，以為佢同劇中一樣懶反叛，原來好鬼慳家識諗。「因為拍完劇好攰，開工唔會揸車，出九龍香港，搭火車好過啦，我住火車站隔籬之嘛，出街泊車又貴，所以我買咗車兩個月都未泊過S位，基本上係未泊過車，哈哈，因為專去啲無乜車嘅地方操車。」操熟手車咪可以媾女？「以前會諗有架車，出去玩會易啲識到女仔，我諗應該都係嘅，不過真係未試過，我𠵱家又無拍拖，如果有拖拍又有車，開心啲方便啲。」我望一望地下啲DomDom，再望一望謙仔，「嗱，你唔好亂諗呀，哈哈哈。」
攞命Kitty太陽擋
「暫時嚟講，我老竇揸架車多過我揸，如果一齊出街都係佢揸，費事俾佢哦。」佢模仿聲線扮老竇：「你咁樣實俾人抄牌，Cut線Cut得快過頭啦，連Cut兩條……」老竇哦你揸得快？「唔係，我開得好慢，開頭熟習緊架車嗰陣仲慢，啲人係咁爬我頭，個個爬完都擰轉頭望一望我係乜人，我都諗過貼張新手駕駛貼紙，多多包『含』。」包涵呀！「我老竇仲成日幫架車做Facial，即係洗車，最搞笑係有次我用車，攞車嗰陣睇到架車有塊太陽擋，係HelloKitty！嘩，唔係吖嘛？佢話平喎，無所謂喎，真係……」年輕人，咁有無Dreamcar呀？「我鍾意四驅，都係PorcsheCayenne；不過R8又好正，Audi呀，即係方中信嗰架。唔，Dreamcar最好一樣一架啦。」啱喇，後生仔有志氣，更啱嘅係，男人唔怕花心呀。「嗱，呢句唔係我講㗎。」
BMWX54.8i規格
引擎：4,799c.c.V8
馬力：355hp/rpm
傳動：6前速Steptronic加減波
扭力：475Nm/rpm
車價：$943,000
查詢：BMWHK（27145271）