立法會選舉投票日殺到埋身，候選人不分黨派，幾乎人人都打告急牌，至於邊個係真告急，邊個係假勢危，選民可能難以判斷，八方收到一啲消息，係有關於左派幕後調兵遣將嘅微妙變化，可能幫到大家看出端倪。
九龍西今年戰況激烈，泛民爭到打崩頭，保皇黨為保兩席都好費神，最新消息透露，西環應該棄自由黨田二少，力保鼠王芬。早前鼠王芬被公開踢爆獲工聯會配票，估計可多獲2%選票，近日有人發現民建聯都出手，調動部份助選團為鼠王芬拉票。
兩人共用一隊助選團
有民主派義工報料，指喺部份公屋，噚日忽然多咗人為鼠王芬拉票。鼠王芬有中聯辦撐，人多勢眾唔值得奇怪，令佢哋覺得唔尋常嘅係當中竟然有部份人係民建聯助選團，前日仲見到同一班人，身穿民建聯制服洗樓派單張，點知一夜之間就變臉，化身鼠王芬拉票部隊。
民協馮檢基都察覺民建聯同梁美芬幕後有古怪，噚日喺選舉論壇上踢爆，民建聯助選團會隨時變身幫鼠王芬，兩人助選團其實係一個班子、兩塊招牌，鼠王芬對此冇特別回應。如果上述情報準確，即係話李慧琼同梁美芬好有機會變成九西Twins，以姊妹花姿態雙雙入局。
除咗九西，九龍東都有鬼馬過票現象，話說有掛名陳鑑林助選團人士，喺街上派傳單時呼籲選民支持鑑林，上樓逐家逐戶拉票時，卻叫人投票俾工聯會嫻姐，點解咁做呢？兩邊陣營各有說法，左派話因為嫻姐今次排第二，工聯會名單恐防會唔夠票，因此要留有一手；民主派則指工聯會一席不保係天方夜譚，所以估計嫻姐想衝擊第二席，左派試圖連取三席。
八方對此猜測甚有保留，因為理論上同實際上都唔可能，另一說法反而幾有趣，就係嫻姐想搏到盡，以九東票后姿態告別立法會，吐盡四年前俾大班力壓嘅一口氣。姑勿論投票結果，工聯會、民建聯助選團機動性強，配票如臂揮指係不爭事實。好似喺新界西，工聯會義工去屯門區洗樓，請求街坊俾票民建聯譚耀宗，而喺葵青區，工聯會則拜託大家要睇實自己人王國興，如果配票收效，即係左派喺新西多一席進賬，連同自由黨周梁，建制派同泛民平分秋色。
mailto:[email protected]