恒指20000點大關終失守，早前與某「賭性」都算幾強的基金經理「吹水」，彼稱若港股20000點失守，就全面撤退。不少人都同佢一樣咁諗，可知20000點幾乎係全民共識的好淡心理大關。
港股昨甫開即跳空裂口插穿20000點，收市報19933，跌456點，成交562億。
在今次跌浪期間，星俠多次強調戒急用忍之道，炒作情緒由牛市時的無比亢奮，變為趨向極度平靜。股票價格不斷地跌，一樣要用做功課心態去睇；「搜股」期間，有時某些福至心靈的動作，可能會有意想不到的效果。昨日大市最多跌681點，靈光一閃，就㩒吓「681」睇睇，隻681中民控股竟逆市大升近29%，認真湊巧。
跌穿升軌利淡
大跌浪進入高潮，大價股輪流被洗倉，滙控（005）昨日大成交一舉插穿120元，10日線支持即告失陷，股價更以117.30元最低位收市，並已跌穿由7月中低位112.20元建立的上升軌，走勢利淡，短線若再爆現裂口式下跌，恐怕連年內低位104元延伸而上的長期升軌也會不保，料低位在後頭，無謂急於撈貨，待跌至100元邊緣才考慮。