周六日戲碼，睇見唔多開胃，毫無「政績」支持，大熱又唔想買，冷門又明知佢好難跑出，胡亂落注買咗都唔安心；就好似見到成堆騎呢立法局選舉候選人混戰一樣，但又想盡公民責任去投票。不過成日咁長，點都要刨到兩三場好嘢俾波友研究吓，首選係喺中立場對格魯吉亞嘅愛爾蘭W，串比利時主場贏愛沙尼亞及巴甲富明尼斯「大」，3串1當一場賭，保留實力迎接下周末起嘅連場大戰。
選舉就話玩告急，2010世界盃外圍賽叫做啱啱開始，列強面對一眾魚腩，麾下球星毋須出盡全力為國賣命吓？何況呢兩輪國際賽後，即將有歐聯上演，加埋球員季初狀態未臻頂峯，咁多疑點，串條熱門5、6串1者，要有斷纜準備。
精銳盡出踢中立場
小弟首選人腳整齊嘅愛爾蘭，喺德國緬恩斯嘅中立場鬥國家受入侵嘅格魯吉亞。呢個客W得1.55倍，莊家算開得辣，但又不太乏味；但環顧陣容，不計大哥英格蘭，比起其他兄弟班威爾斯或蘇格蘭，實在理想得多；包括有門將基雲、後衞芬倫、李察鄧尼同奧沙、中場史提夫亨特、基爾賓尼；前鋒有上周於英冠中三元嘅奇雲杜里，以及大哥級射手羅比堅尼。
小弟亦有留意上次他們作客挪威，半力下仍能在上半場佔盡上風，結果最後雙方各一言和；今次對手格魯吉亞，上仗友賽靠完場前一分鐘入球，爆大冷贏殘陣嘅威爾斯獲好評，但今次打真軍卻缺地利，兼在緬恩斯這個僅可容納20,000人嘅球場作客，反有利預計入場支持者約5,000人嘅愛爾蘭打簡單進攻足球，愛軍新帥查柏東尼穩響頭炮。
巴甲博富明尼斯「大」
另一場選老中青國腳盡回歸嘅比利時，主場食愛沙尼亞；再博條兩隊小勝開「和」。另近期至愛嘅巴甲當然不能不提，只選直播嘅富明尼斯與榜首嘅甘美奧開「大」，巴西周日才有比賽，全國視線盡在可容納近10萬球迷嘅馬拉簡拿球場，且看上屆紅鑽射手華盛頓，能否助富軍攻破「1哥」防線。
近5場往績：L
蘋果波神
水準有目共睹，長跟必有着數。