識飲識食嘅名嘴蘇施黃，近排以天價酬勞再度出山，由有線過檔無綫主持本月22號推出嘅飲食新節目《蘇Good》，雖然忙到甩轆，但至叻嘆世界嘅阿蘇點都要偷得浮生半日閒，前晚就約埋密友金燕玲，仲有陳淑芬、狄波拉同佢老公鬍鬚Kong等，一行七人到中環蘇豪區開餐，嗒紅酒嘆fusion菜。
食家現形
前晚7點零鐘，阿蘇、金燕玲同拉姑夫婦等人已到達歌賦街嘅gough40餐廳，不過阿蘇同金燕玲打對角坐，現場見佢哋心情大好，叫咗多碟美食，阿蘇一副食家feel，細細啖試真味道，金燕玲就不斷飲紅酒，拉姑夫婦顯然飢腸轆轆，猛飲湯同𡁻餐前包。
席間眾人齊齊亁杯，大家邊食邊傾，拉姑同金燕玲直情雞啄唔斷，後者兩杯到肚更顯豪情，講嘢手舞足蹈。同成班男友人平排坐嘅阿蘇，表現同身邊男伴無異，都係負責聽同食，甚少搭嘴，對女士們好有風度。
其實阿蘇同金燕玲嘅親密關係已維持兩年，經常有影皆雙，阿蘇搵到好嘢食，就梗係預埋金燕玲啦，原來前晚佢哋光顧嘅餐廳，之前阿蘇曾經公開介紹過，大讚嗰間餐廳嘅豬扒美味。
名人食堂
馮仁昭聽聞呢間餐廳嘅沙律、海鮮湯同甜品都有啲名堂，難怪舖仔細細，都吸引唔少名人如黎明同樂基兒嚟幫襯啦！
