左派動員力量令人吃驚，民主派真係要甘拜下風。八方有個老友，日前到尖沙嘴某五星級酒店hightea，其間見到大堂經理同鄰枱一名貌似江湖中人男士密斟，呢位男子臨走前，突然交咗幾張紙畀經理，八方老友眼利，昅到原來係民建聯及工聯會各區候選人名單。
據佢講經理接過名單後，同該男子拍膊頭，擺出我辦事、你放心嘅表情，之後該男子好滿意咁埋單走人。八方老友同呢位經理有兩句，之後問佢係咪要幫手拉票，經理話該男子係區內有名氣人物，雙方認識多年，今次開到聲話要幫手，好難托手踭，但由於公司冇批准，所以唔可以太高調拉票，「影印幾張畀相熟同事睇吓就算，未必會人人派一份。」