亞姐吳綺莉喺99年未婚生咗「小龍女」吳卓林之後，因為不滿成龍話中咗陷阱生BB，所以決定做單親媽媽，自己養大囡囡，為咗唔想受到騷擾，佢02年6月帶埋個女離開香港去上海定居，自此退出娛樂圈，專心照顧囡囡。轉眼間卓林已經8歲，喺上海浦東讀緊國際學校，根據新浪網噚日報道，吳綺莉上個禮拜三帶住個女去花鳥巿場買金魚，然後兩母女再去附近嘅會所游水，趁暑假完結前進行親子活動。
買花游水親子樂
戴住眼鏡嘅卓林，唔單止生得高大，連個樣亦似足媽咪吳綺莉。當日下晝，着住便服嘅佢哋喺屋企出發，卓林手上仲攞住餅亁充飢，邊食邊行，十分活潑，佢一馬當先行喺前面，但就俾媽咪訓示一番，叫佢食嘢要顧儀態，卓林好聽話，即刻行去垃圾桶旁邊食，仲用手抹走面上同嘴邊嘅餅碎。
之後吳綺莉同卓林去買金魚，卓林自己揀魚，揀好咗先至叫媽咪畀錢。其間，吳綺莉又喺附近買花，然後佢哋再一齊去會所游水。性格獨立嘅卓林就跟住游水教練學游水，而吳綺莉就喺成人池暢泳，雖然已為人母，但吳綺莉仍保持苗條身材。
成龍做名譽教授
此外，成龍噚日喺尖沙嘴獲美國薩凡納藝術學院頒發名譽教授銜頭，佢話自己做事都不求回報，而且佢小時候都度過窮嘅日子，當時有人向佢伸出援手，所以𠵱家佢有機會就會幫助有需要嘅人。