近排星期一至五每晚九點半總是一路扒飯，一路睇《家好月圓》，同阿媽談論劇情，重拾昔日的家庭氣氛，劇中我最喜愛角色是正派的荷媽。現年58歲的司棋姐，戲裏戲外都嚐盡人生甜酸苦辣，戲裏荷媽經常嚴囗兼備教導一班仔女，但今次做訪問，司棋姐卻說要向同台演出舞台劇的後輩王祖藍學嘢！
記者：蒙為亮
攝影：陳陶鈞
真正的Maria──超群餅店創辦人李曾超群。
《留住百味情》中司棋姐飾演女主角Maria（李曾超群），胡美儀就飾演好友芳姐，羅冠蘭就是Maria的生意夥伴馮太。三位都是好戲之。
祖藍話喺電視所學嘅用聲和演繹方法，再加上自己嘅舞台劇底子，雙劍合璧，今次的演出會更得心應手。
愛家人，甜到漏
舞台劇《留住百味情》以飲食比喻人生，甜酸苦辣都有齊。司棋姐1968年加入演藝界，四十年來作過多方面的演出，由花旦到善姨，由大契到荷媽，每個角色都深入民心，由少女紅到𠵱家58歲。但對司棋姐而言，人生之最甜，還是仔女錫自己。戲裏的荷媽捱大一班仔女，戲外司棋姐也是愛子女心切，她說後生時有一個美滿家庭，以及三個好錫自己嘅仔女，已經心滿意足，「最開心係可以一家人齊齊整整平平安安，我後生嗰時對啲仔女真係好上心，會將最好的都畀晒佢哋，所以最甜係有佢哋。」說時司棋姐嘴角帶笑，貫徹慈母角色。
女兒出走，心酸透
家好月圓當然幸福美滿，不過仔女有時都會反叛唔聽話，「我認為鹹同酸都係同樣令人唔舒服，最大嘅感受係試過同阿女有誤會，我哋嬲咗大家，分別七年無睬過對方，之後阿女仲離家出走，當時我個心真係好酸。不過，之後大家都冰釋前嫌，話晒都係自己個女，有咩都可以傾……」聽到呢度小記忍唔住笑咗出嚟──「話晒都係自己個女」呢句對白在《家好月圓》中經常出自荷媽口，司棋姐根本就是荷媽。
戰癌魔，最苦
人生之苦，司棋姐就坦言自己當年曾患上子宮頸癌時感受最苦：「其實同劇（《留住百味情》舞台劇）中嘅Maria一樣，我都有過cancer，不過當時我就無Maria咁積極，反而覺得個世界好灰，有一種好想收埋自己嘅無助感，但好在當時有好多親友為我不斷打氣，最後都可以捱得過。回想起來，真係非常感激佢哋一路上支持同鼓勵。」歷盡千帆過後，我們總是學會以感恩的心回首，司棋姐知道作為一個病人走每一步都不容易，所以在百忙之中，亦參與《留》的演出，為癌症病人打打氣。司棋姐還笑言自己私底下認識李太，所以在掌握角色方面會較容易，不過講到性格，司棋姐就話Maria同自己完全唔似：「Maria真人好樂觀好積極，我自己冇佢睇得咁開，經常都會因為身邊嘅人和事唔開心。」
捉姦第一次，至辣
「最辣一次應該係同一班好姊妹一齊捉姦，當時有個朋友個老公懷疑有外遇，我哋都係一心幫個姊妹取回公道。」原來司棋姐也是義氣仔女，曾經為好友不惜赴湯蹈火，「最後嘅結果就唔公開，不過過程的確十分驚險，𠵱家諗番起都覺得有啲驚。」果然戲如人生，「結義金蘭」之外，還有多一幕「捉姦記」，比《家好月圓》更戲劇。
荷媽教仔？
荷媽經常教仔，今次同後輩王祖藍同場演出，司棋姐就讚不絕口：「祖藍呢個小朋友好叻仔，又努力，佢係戲劇創作出身，所以喺舞台上我反而要向佢學嘢。做舞台劇同做電視劇好大分別，做電視劇唔使一take過，做得唔好可以試多幾次。做舞台劇，對白要記熟，要臨場執生，喺台上每個moment都要傳神貫注咁去演出；做得好唔好，觀眾的掌聲直接表達一切，所以滿足感大過電視劇好多，但的確會有些少壓力。」真謙虛，話「有些少壓力」時都講得氣定神閒，司棋姐縱橫演藝界四十年，真係「荷媽喺大廳」，有乜好驚。
耶穌錫到我燶
被「荷媽」大讚，祖藍亦相當識做，用「求之不得，幾生修到」八隻大字去形容同司棋姐今次嘅合作，「起初以為司棋姐好嚴格，你知我啦，無時正經，都有啲驚畀佢鬧!但係夾吓夾吓，發覺司棋姐好有親切感，喺舞台上有好多溝通同交流。」在娛樂圈生存，識做戲之外，還要識做人。祖藍話自己不是個面面俱圓的世界仔，但是一路上貴人一個又一個，他的致謝名單如下：「在節目方面有珍姐幫我安排一切、遲啲出唱片樂易玲小姐亦幫我好多、當然唔少得陳志雲先生、獎門人也對我照顧有加!」還有，「我真係好多謝耶穌咁錫我，簡直錫到我燶，我每晚幾眼瞓都會感恩禱告……」的確識做，再加埋祖藍本身有實力有演技，自然上位。
以曾志偉為目標
有說，祖藍是近年紅得最快的男演員。由03年做鬧細路的兒童節目主持，到《同事三分親》的劉華，到畀曾志偉睇中做獎老，遲啲仲會出唱片同拍戲。外界都說他是新一代搞笑接班人，他自謙：「真係唔敢當，不過自己最佩服獎門人，做劇可以勁搞笑，做司儀可以超專業，佢會係我努力向前嘅一個目標。」祖藍還有另一目標：「雖然自己是演員出身，但由細到大都想做導演，我經常上網睇吓短片，拍戲時留意導演用嘅angle……」祖藍說話的結尾總是充滿正能量。
《留住百味情》
日期：27-28/9，2-5/10及7-8/10
時間：7：45pm
地點：香港文化中心大劇院
門票：$120、$180、$260、$320及$390
售票點：城市電腦售票網
查詢：31721780
西餅皇后奮鬥精神
司棋姐和祖藍演出的舞台劇《留住百味情》是個「阿信式」的奮鬥故事，主角就是「西餅皇后」李曾超群。超群餅店，曾是本地最大連鎖餅店之一，但後來餅店相繼結業，但李太並沒有申請破產，反而承擔起公司倒閉後的數千萬巨債。生意失敗，大屋搬小屋的期間，李太又發現不幸患上子宮頸癌和跌斷了腿，但李太憑住阿信精神，永不向命運低頭，在對抗癌魔的同時，還努力還債。而今次《留住百味情》就是將她的傳奇故事搬上舞台，所有門票收益扣除成本後將撥捐「癌轉譯研究組織」，作為癌症治療和預防研究之用。
