睇見新一代發燒友，買靚碟不知從何入手真可憐，睇影音或音響雜誌？「有廣告有碟評、無廣告就懶得評」已成大部份雜誌風格，即使錄音唔夠水準，碟評照出、照讚，交代咗個客就算。有些號稱全港銷量最高嘅影音雜誌，多年來竟然連一張發燒碟評也欠奉，兩大版篇幅就只有偶像派歌手嘅專輯或甚至Disco碟。
最令人嘆息嘅係部份發燒友，竟淪落到將翻版碟當發燒碟咁介紹，仲喺網上討論區高談闊論；近期最熱門之例應是《試音．蔡琴》吧！這張由國內品牌推出嘅CD，夠晒明目張膽，零售價$55比一般國內出品還要貴，但明眼人其實一眼便可看得出這只是一張老翻罷了（如果係正版又點會錯漏百出？）。
邊有蛤乸隨街跳
CD碟上標貼列明此碟「來自超級原版一手母帶12首超靚錄音歌曲……」，試諗吓，呢堆歌來自不同年份及多間唱片公司，能得到各大公司提供版權已夠匪夷所思，還要原版一手母帶？即使作大都唔好咁誇張吧！再看碟底還印明每首歌均選自原版母帶嘅XRCD版本就更加令人笑到眼淚水都標埋，咁究竟隻碟係來自超級原版一手母帶定係來自XRCD版本呢？將XRCD再過落一張普通CD度似乎太多餘吧！何況隻碟如果真係咁落本，碟內無理由隻字不提而只印歌詞吧？希望本文出街之後唔好再有人上當啦！
文：李廸偉
（ http://hk.myblog.yahoo.com/reviewcd）