溏心風暴之家好月圓鬥戲人辦第十回
馮素波加入無綫已19年，她在上一輯《溏心風暴》中只客串兩集，今次《家好月圓》的戲份比上輯多，飾演李香琴的妹妹阿梅，發揮得淋漓盡致。波姐自言不會給自己太大壓力，最重要做好自己本份，她又笑謂夏雨飾演的Jo飽夠小男人，衰衰格格，非常抵死！撰文：王崇穎
無綫劇集《溏心風暴》令不少資深演員人氣急升，不過馮素波只佔兩集，未令觀眾留下特別深刻的印象。在今輯《溏心風暴之家好月圓》中，馮素波飾演李香琴的妹妹佘麗梅，戲份增加之餘，角色也甚突出，其中一幕她和表叔恭（李成昌飾）以及Joe飽（夏雨飾）被Sa姨（關菊英飾）用掃把邊打邊趕出門口的一場戲，最令人津津樂道。
摸熟角色性格
這場戲除了贏得觀眾欣賞外，波姐也對此甚難忘，日前她接受訪問時說：「呢場係第二集，返到屋企睇完個劇本後，都覺得好好笑，為咗呢場戲我仲專登去買對大一個size嘅鞋，因為劇中我會甩鞋，我怕到時做唔到甩鞋嘅效果。」
劇中李成昌飾演波姐的兒子，兩人對手戲相當多，波姐大讚拍檔專業，她說：「我好欣賞佢演戲嘅老練，成套戲我同佢最多對手戲，好多危機上嘅問題佢都可以幫我解決得到，埋位嘅角度佢又不時提我，我好欣賞佢對演戲嘅專業。」
第一輯《溏心》叫好叫座，波姐今輯的戲份比第一輯多，不過她表示沒有壓力，她說：「都唔會有壓力㗎，我喺TVB拍劇都19年，我本身讀開佛學，對名利放得好低，總之專心工作做好自己嘅角色，留意對手嘅演出，咁你埋位時就可以入戲。」
劇中每個演員均有自己一套的演出方法，波姐想起夏雨的Jo飽一角，也覺得十分抵死，她說：「佢個角色嗰種衰法，真係好抵死，所以我成日都笑佢，同佢做對手戲一望到佢就好好笑。如果真係有個咁嘅男人喺身邊，你真係奈佢唔何，你覺得唔知可以點對付佢。」
談到自己的角色，波姐自然早已融入心中，她說：「我必定要熟個角色先可以入戲，我做琴姐個妹，所以喺我內心佢就係我家姐。」
讚司棋有動力
今次跟李香琴、關菊英和李司棋合作，波姐表示只曾經跟琴姐合作過，她說：「琴姐喺粵語片時代已經好紅，司棋姐同關菊英就未合作過，以前個個都讚司棋姐好戲，今次同佢合作完後，我真係好欣賞佢，終於明白點解咁多人讚佢好戲，完全收放自如。你喺電視只會睇到佢嘅演出，但當你喺佢身邊睇佢拍劇時，就知道佢啲戲幾咁有動力。」
搶先爆：紅姨補擺酒示威黑面收場
今晚播映的第27集《溏心風暴之家好月圓》，講述紅姨（米雪飾）不追究Sa姨（關菊英飾），但藉詞迫Jo飽（夏雨飾）補辦喜宴，向荷媽（李司棋飾）示威，紅姨更主動向周刊爆料和耍手段迫Jo飽請一班仔女和荷媽到場，眾人堅持不出席，最後荷媽得悉親自調停，答應出席喜宴。
喜宴當晚，紅姨不但安排荷媽一家坐主家席，更強迫眾子女上台高歌賀Jo飽，結果大家在台上祝福「爸爸媽媽」永遠幸福，台下的荷媽感動流淚，台上的紅姨則黑面收場。另外，洗心革面的Sa姨不但獲眾人原諒，更與恩賜（阮兆祥飾）復合。
《溏人心聲》
最愛劇中金句「窮人講嘢冇人聽」
波姐表示劇中荷媽（李司棋飾）說的「炒菜冇油唔過青，窮人講嘢冇人聽」充滿人生意味，是一句很深奧的說話，波姐說：「喺最低落嘅時候，腦海中都出現過呢句說話，當你真正參透咗之後，諗法就唔同，所以令我好深刻。」
自選最愛場面 顧親情陷兩難
波姐和琴姐扮演兩姊妹，兒子李成昌卻虧空公款，令波姐左右為難，她說：「我嘅角色對家姐真係心存感激，但又要爭住個仔，好矛盾。」
表現最好演員 米雪奸得討好
波姐對米雪的演技讚不絕口，她說：「我好欣賞米雪，因為佢畀我嘅感覺係好注重外表同儀態，但喺劇中佢除咗外表要靚外，同佢做出嚟嘅態度都好有氣量，而且佢係一個唔討好嘅角色，我唔會去憎佢，呢樣令我好佩服。」
