吊環王陳一冰同彈床公主何雯娜日前隨隊訪澳時，俾人踢爆夜半相會，關係有啲微妙，諗唔到表面斯文嘅陳一冰私下係一名活躍分子，原來喺佢約會何雯娜之前、即係剛過去嘅星期日訪港時，陳一冰曾經同一名戴墨鏡嘅長髮靚女同遊尖沙嘴名店，呢位靚女正係同佢傳緋聞、喺黃曉明主演嘅電視劇《鹿鼎記》裏面飾演建寧公主嘅20歲內地女星舒暢。
撰文恭賀奪金
約兩周前，內地有傳23歲嘅陳一冰同舒暢拍拖，男方大力否認，點知轉頭就俾人影到同舒暢喺香港逛名店。前日陳一冰喺搜狐嘅個人網誌裏面自爆同舒暢相識經過，佢話完成奧運吊環決賽（8月18號）嘅兩日後，有朋友同佢講舒暢喺網上撰寫一篇祝賀佢奪金嘅文章，陳一冰睇過之後覺得舒暢寫得好好，於是透過朋友攞咗舒暢嘅手機號碼，親自答謝，經過幾日嚟嘅聯繫，佢哋就係咁做咗好朋友嘞。陳一冰仲話舒暢本來喺無錫拍戲，剛好有幾日假期，於是就請佢嚟香港逛街。
兩人口供唔夾
陳一冰透過網上同電話攻勢主動約會舒暢，已經令人驚訝，其次係依照陳一冰嘅講法，佢上個月嘅20號先識舒暢，竟然喺12日之後舒暢就已經千里迢迢嚟香港陪佢行嗰幾粒鐘街，相信佢哋嘅感情都唔係咁簡單。
至於舒暢所寫嗰篇打動陳一冰嘅文章，文中佢直認喜歡陳一冰，佢話：「我喜歡陳一冰陽光般略帶稚氣的微笑，更喜歡他的灑脫。」不過舒暢前日同內地傳媒解釋緋聞時，就同陳一冰口供唔夾，佢話經朋友介紹識陳一冰，佢仲話：「我和陳一冰是非常好的朋友，他是一個善良坦誠的人，我們的友誼簡單純潔。」