雖然民調說這次立會選舉投票意欲可能創歷史新低，但我認識的人都會去投票。他們的投票取向旗幟鮮明，有板有眼。
C9一族擺明揀好樣候選人，女人要睇對方有冇藐嘴和電眼，有就唔合心水，老老實實，做議員放電兼搽晒腳甲博乜先？師奶自己冇時間扮靚瘦身，所以唔抵得女候選人太過姿整。菜菜子又點？師奶啋一聲，典型的憎人闊太厭人娘丙。她們會投票給陳淑莊。
電車男一般人認為不會投票的，錯了，投票站就腳方便，不必跟人溝通，牛記笠記無人理，只需要在名單蓋印就得，冇難度。電車男當然最想投疑似AV女郎一票，退而求其次，戀母情意結推動下，投給兩子之母但超級潮的毛孟靜都唔錯。
巴士阿叔問題解決了，就會心平氣和投票。原來他們緊貼時事，最熱捧王永平。平叔唔選真遺憾，好彩阿叔還有得做老闆自己揀，同聲同氣投毓民。
同志圈的朋友縮沙唔敢去布吉曬陽光，留港搵細藝，他們說史泰祖幾掂，但會把票投給田北辰，讚他一頭鬈毛拉票耍太極個樣，勁sexy咁話。