星期六39 西班牙vs波斯尼亞
07/09 04:00開賽（now633台直播）
星期六47 墨西哥vs牙買加
07/09 06:00開賽
唔知係咪有人質疑畢傑嘅貼士水準，原本逢周五見報、由在下全包嘅〈英超早飛王〉，𠵱家改名為〈早飛2+5〉，仲要加入位猛人牽牛坐鎮，即逢周二、五我同牛兄會輪流同大家傾吓波經。新專欄都係由我畢傑打頭陣，推介西班牙迎戰波斯尼亞開「細」，千祈咪再衰！
上期〈英超早飛王〉玩「包剪揼理論」，結果布力般大敗害得我英名盡喪。過去已過去，畢傑一向面皮夠厚，呢個禮拜繼續請纓出戰，橫掂〈英超早飛王〉名義上已經摺埋咗，請大家重新嚟過畀多次面。
西班牙戰術保守單調
今個周末4大聯賽讓路，換上由世界盃外圍賽當道，全日超過50幾場賽事，我最後都揀咗自己最熟路嘅西班牙，主場對波斯尼亞要「細」。上場西軍作客友賽丹麥，係新帥廸保斯基接手阿拉干尼斯後首場比賽；睇番廸保斯基呢位教頭好鬼保守，直頭沿用西班牙捧走08歐國盃嘅正選陣同丹麥周旋。
最後係就係大勝丹麥3:0，但半場廸保斯基戰術單調不思進取，賽和0:0充份反映佢好保守。下半場慶幸有沙比阿朗素早段入波開好個頭，否則唔會有3球進賬。唔好忘記，今次西班牙有費蘭度托利斯及大衛施華因傷退隊，其餘正選多來自巴塞及皇馬成員，須知兩支西甲班霸喺聯賽首戰齊齊輸波，球員狀態應有待催谷，所以我貼只會小勝波斯尼亞。
墨西哥強攻牙買加
今期「主菜」講完，講吓仲有咩甜品好食，焦點不妨移去中北美洲區：墨西哥迎戰牙買加。主隊今次入選名單有杜斯山度士、卡路士韋拿、白蘭高同奧馬巴禾等攻擊好手，加上近6次主場對牙買加全勝兼開「大」外，甚至4、5、6、7球都開過，今場同西班牙推介相反，熱選「大」。
希望〈早飛2+5〉頭炮打得響，畢傑如果又再失威，仲有牽牛下個禮拜二收復失地！文：畢傑
〈早飛倉〉
主菜：星期六39西班牙細（2.45）@700
混水摸魚過關：星期六35荷蘭勝[-1]（待定）x星期六47墨西哥大（1.52）2x1@300
今日早餐價錢：-$1,000
早飛倉結餘：$99,000
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六21：以色列（上）
主場6連勝的以色列有賓希姆及班拿約等壓陣，瑞士守將辛德路斯缺態未有入選，前鋒阿歷山大費爾亦剛傷癒，主隊少讓平/半要捧。
星期六35：荷蘭勝[-1]（待定）
荷蘭極重視今場友賽，洛賓、尹佩斯及雲達華治等俱獲徵召；澳洲轉戰亞洲區作賽後，普遍對手實力較弱，或使作戰狀態下滑。
星期六53：委內瑞拉勝[+1]（1.72）
秘魯名將法芬及比沙路分別因傷及缺態落選，3日後又要硬撼阿根廷，難讓；委內瑞拉作客成績稍有改善，有力搶分。
星期六30：奧地利勝[+1]（2.25）
有新帥布克拿領軍的奧地利，上場賽和意大利2:2表現不俗；法國已非一線頭球隊，1.55倍W搵鬼買，小心！