睇一啲選舉論壇，覺得幾無厘頭，冇乜興趣，但學生Ｙ教左丁山上YouTube搜尋黃毓民，話好過癮咁話。於是照辦煮碗，嘩，幾段黃毓民立即彈咗出嚟，全部有五粒星，學生Ｙ話越多星表示越多人睇，黃毓民罵民建聯，黃毓民鬧莊永燦呢兩段，有好多hits噃，㩒嚟睇吓，黃毓民發揮昔日名嘴本色，口若懸河，口水快到噴唔切，直情狀態大勇，九龍西邊度有人夠佢砌呀（講口才啫！）如果佢入到立法會，林D9都唔知點算好。九龍西有好多喜歡熱鬧、鬥嘴之年輕選民，唔怪得選舉論壇之後，中大與港大之民調都顯示黃毓民人氣急升，九龍西有好多組人大混戰，左丁山唔記得咁多，請編輯代左丁山寫番晒其他候選人名字，以示公平！（九龍西候選人名單：莊永燦、李慧琼、鍾港武、陳偉明、鄭泳舜、龍緯汶、韋世民、涂謹申、林浩揚、毛孟靜、伍月蘭、鄧志盈、林依麗、梁美芬、梁偉權、林家輝、黃毓民、李偉儀、田北辰、何顯明、馮檢基、莫嘉嫻、秦寶山、黃志勇、楊振宇、劉千石、柳玉成、蔣潔鳳、徐達偉、譚凱邦）
學生Ｙ問左丁山：「莊永燦係邊位？」左丁山反問番佢，大家都唔知。今屆有唔少候選人參選，據稱無政黨背景，但在一啲論壇中，見到呢類人專門針對民主派、社民連或自由黨發問，另外各政黨又特登向呢類人物發問一啲無關痛癢嘅問題，分明係志在燒時間，打拉布，動作令人思疑，唔通係一早夾定嘅？知名度低候選人願冒保證金被充公嘅風險，為咗乜？或者上電視台、電台，得到好大曝光率，宣傳價值大過保證金都唔定。
學生Ｙ話毓民罵得過癮，民調支持度大升，但涂謹申勢危（《蘋果日報》9月3日A6版），為何如此？左丁山一時唔識答，唯有問吓家在九龍嘅秘書Ｖ，佢話屋企人講配票，一早見到涂謹申有15點支持度，於是話要分啲畀毓民，希望兩個人都掂。唔知係唔係人同此心，心同此理呢，最新民調就見到毓民勁升，涂謹申大跌。配票呢回事，難度甚高，真係說易行難，泛民主派支持者並非坐定定、聽命令嗰種人，慎防顧此失彼。