溏心風暴之家好月圓鬥戲人辦 第九回
李成昌在《溏心風暴之家好月圓》中飾演的表叔恭乞人憎到暈，煽風點火，又挑撥離間，老屈阿月（楊怡飾）再穿公司櫃桶底。有網友更嬲到用粗口大罵他，難得李成昌知道後仍笑說：「好開心，我就係想咁。」
撰文：藍文浩
於70年代末加入無綫的李成昌，繼上次《溏心風暴》中扮演細契的姦夫後，今次再延續賤佬角色，飾演表叔恭，甘做紅姨（米雪飾）的傀儡。紅姨在劇中不斷諗計奪去荷媽所有，表叔恭為一己私利從旁協助，再趁機會「抽水」，陰濕又衰格。
處心積慮行惡
一而再、再而奸，表叔恭的一身賤佬造型本已不甚討好，再加上尖酸刻薄的投機搵着數性格，難怪雅虎網站就有人用粗口留言，叫紅姨和表叔恭「趁地淋」。昌哥日前接受訪問時笑說：「好開心呀，冇諗過會引起咁大反應，好似上次《溏心風暴》都有人剪片擺上Youtube，俾人鬧但都叫有少少親切感，今次再奸得實啲，用唔同手法去演，就係想有咁嘅效果，但其實壓力都幾大。」
昌哥續說：「呢個表叔恭根本就係愚忠，本來一路好聽琴姐同夏雨話，但佢哋其實冇當過表叔恭係自己人，所以到後來表叔恭就慢慢變化，先砌黎諾懿再領功，之後一路處心積慮想呃米雪，其實米雪一早已經睇通晒，所以掉轉頭俾米雪控制番。」
《家好月圓》已踏入白熱化階段，荷媽和紅姨相爭越見激烈，身為紅姨手下「主將」的昌哥說：「其實俾夏雨知道唔畀佢返嚟送終，同穿櫃桶底兩件事後，表叔恭同佢阿媽其實都已經走得啦，但阿紅唔畀，就係要靠佢哋講說話支持自己，再繼續去煽風點火，之後琴姐唔再係自己老細，仲連佢跌親都唔理。」
嘆新人搵食難
提到《溏心風暴》和《家好月圓》主要靠前輩演員食糊時，多次擔任藝員訓練班導師的昌哥說：「其實有份做真係執到，有得演呢啲戲真係好開心，前兩日我出去玩仲有好多後生仔搵我影相。𠵱家啲新人其實好難撈，競爭太大，但係佢哋一樣好有心機、好勤力，不過𠵱家機會太少喇。」
攝影：陳順禎
搶先爆：紅姨跌落樓梯 Sa姨被捕
今晚播映的第26集《溏心風暴之家好月圓》，劇情講述「攞婆」Sa姨（關菊英飾）眾叛親離，即使三番四次偷偷返家，聲淚俱下認錯兼寫悔過書都沒人理，最後棲身賓館的她覺得一日都係錢累事，並聲言如果得到親人原諒，她會「食晒啲銀紙落肚」，最後眾人也接受回她。
其後Sa姨獲悉荷媽（李司棋飾）曾被紅姨（米雪飾）掌摑，湊巧紅姨想找Sa姨做其卧底，監視Jo飽（夏雨飾）在荷媽家的一舉一動，轉性的Sa姨一心打算為荷媽報仇，誰知混亂間紅姨失足跌落樓梯，Sa姨被捕收監。
另外，工於心計的嘉美（徐子珊飾）為博阿卡（陳豪飾）歡心，不惜扮可憐博同情，後來更出動三點式bratop在沙灘上色誘阿卡。
《溏人心聲》
最愛劇中金句 「人在天堂，錢在銀行」
李成昌：「呢句真係一嘢中晒，提醒香港人唔好成日掛住收收埋埋啲錢，其實呢句說話都令我開通咗，真係唔好成日掛住搵錢儲錢同埋太執着，到頭來咪又係人在天堂，錢在銀行。」
自選最愛場面 邪變正大團圓
「結局係大團圓，但觀眾一定估唔到點樣發生，正係贏咗邪，但邪又變番正喎，大家睇完一定冇嘢好講，米雪做得好正，去到好盡，當中個變化好犀利。」
表現最好演員 Sa姨最難演繹
「Sa姨（關菊英飾）呢個角色真係好好玩，唔易演㗎，角色係衰，但又唔係大奸大惡，最鍾意撩埋啲是是非非，成日以為自己嗰套啱晒，其實全部都係歪理。」
