有「傳媒教父」之稱嘅無綫電視前助理總經理黃應士「吉叔」，噚日獲浸大頒授榮譽大學院士，接受殊榮後即時喺台下「講學」，教在場後輩如何做新聞，又批評一班跟佢出身嘅弟子、𠵱家各大傳媒新聞部主管，近年偏重器材化、平台化，做新聞只係得個快字，有啲消息未核實就出街，又或者做直播有畫面卻冇內容，應該好好反醒。
新聞忽略正確資料
吉叔主政無綫新聞部幾十年，04年退休，佢話𠵱家新聞一味趕快，忽略新聞最重要係資料正確，「今日錯咗，聽日修正，冇人保證觀眾會睇到。」佢好自豪話，19年前八九民運期間，無綫連續七個禮拜冇報過一單錯嘅新聞，「連新華社都出過錯。」
佢話新聞消息，冇兩個或以上人士作實都唔好報道，「我以前未核實前TVB唔會播出，俾亞視、俾now早五分鐘出，唔會死人㗎。」互聯網年代，24小時新聞台乜都要快，吉叔則話高層要有慢嘅勇氣，「你有咁嘅資格做總監，就有咁嘅責任做好佢，就睇你夠唔夠pok。」
噚日係吉叔大好日子，佢多位徒弟好似亞視譚衛兒、梁家榮，TVB袁志偉都有到場，前無綫新聞之花趙麗如更帶埋1歲愛女到場，好熱鬧。