網誌日期：2008-09-03
「我想加盟車路士，讓我離開吧！」這是羅賓奴戲劇性棄車仔加盟曼城前一天，在西班牙開記招的宣言。
小弟睇好羅賓奴嘅前景，不代表欣賞佢嘅為人。「大菲」史高拉利遭出賣發脾氣，可以理解（未知佢老人家係為車仔抑或羅賓奴而發）。「大菲」以為已任教世界頂級富有球會，要風得風，要雨得雨；契仔羅賓奴更開晒記招表明心迹（搞到上星期日晚皇馬軍心大亂，敗走拉科）；但到頭來，只差數百萬鎊，契仔羅賓奴還是去了英國更北的曼徹斯特，投只有份踢足協盃、但一夜之間「暴發」嘅曼城。另外，幾乎喺熱刺玩罷踢嘅貝碧托夫，又話加盟曼聯唔係為錢，否則自己已去了曼城或車仔，有幾真心，大家心裏有數。
良禽擇木而棲，絕對明白球員生涯短暫，但離開應有更好處理方法，尤其係貴為世界頂級球星。但有些球星嘅身家同智慧不成正比，一派胡言；所以我永遠尊重碧咸對費Sir、對太座維多莉亞，同對水平低劣嘅美職聯嘅忍耐力，那管他說話雞仔聲用詞匱乏，但起碼真心得多。
蘋果波神｜個人資料
英國足球狂熱，願能年年去朝拜。
（逢周一至周五見報）
韋斯咸截止後話簽多兩件，內部行政幾混亂。
錫菲聯失東治，哀鴻遍會。
轉會新聞太震撼，冇人理會嚟緊無謂國際賽。