昨日港股先跌後抽升，升138點，嘉賓指股市利淡因素其實不多，亦有見底訊號，油價回落更是好消息，即使有股份被沽售都是因為大行唱淡，加速市場的悲觀情緒，所以投資者不要過份悲觀。
楊：主持楊慧玲
沈：英皇證券研究部主管沈振盈
楊：港股今日（周二）下午點解突然升番咁多呢？
沈：泰國政治動盪理論上唔應該對港股有影響，日本首相離任雖然影響到市況，但程度未至於好嚴重，喺市場上，極淡的因素唔大，只不過壞消息會一傳十，十傳百，唔係真都變咗係喇。其實呢啲壞消息都只係舊瓶新酒，壞因素被放大，反而反映唔到油價跌同美元升等利好消息，好多時都係因為大家信咗大行報告，加速市場走向悲觀，但我相信總有一日係淡友中招，被好友挾，照𠵱家睇，恒指技術形態幾好，成交又增加咗，所以投資者唔需要過份悲觀。
我20蚊買咗鞍鋼（347），𠵱家跌到得10蚊，點算好？
鞍鋼有力反彈至16蚊
沈：舊年佢最高去過40蚊，20蚊買咗之後就遇到資源股洗倉潮，所以跌得好急，但其實有好多股票已見咗底，好似鞍鋼同其他金屬股。第一，原材料價格下調唔一定對資源股有負面影響，因為成本其實都會相對下降；第二，之前熱炒雪災同地震重建概念所以股價急升到40蚊，即係話啲人對呢隻股好有信心，現去到10蚊咁平，冇理由反而對佢冇信心嘅，所以佢應該係有得彈。我相信佢企穩之後好快會升到15至16蚊，你唔好睇小呢次反彈，到時睇定啲先決定走唔走。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
